「暑假」對於好多打工仔嚟講就冇咩特別，但係對於一眾學生哥同埋立法會議員嚟講就終於可以抖抖喇！立法會上個禮拜已經開始放暑假，而行政會議亦都喺下星期有個兩個禮拜嘅「細暑假」。雖然大部分議員本身都有另一份工，不過Jenny聽講唔少議員已經Plan好咗呢個假期去旅行喇！Jenny都好想放個久違嘅暑假呀！

 

我的心情，你懂的。

 

再斥泛民「拉布」記者極速完稿

 

　　放完暑假就會進入下一個立法年度，所以立法會陸續公布年結。立法會主席梁君彥就早早搞掂咗喇，今日就輪到財委會主席「波哥」陳健波出嚟交代吓今年財委會又做咗啲乜。不過Jenny估大家都知㗎啦，循例要出嚟話吓泛民「拉布」、平衡雙方意見好難做之類。

 

　　好多人都問點解有啲議案喺工務小組討論完，又要喺財會再討論多次呢？波哥就話其實政府同非建制派都有責任嘅......波哥一講起，就如缺堤嘅江河，係咁同Jenny呻：佢話啲激進嘅非建制派呢頭話要監察政府，但又唔肯請啲官員上佢哋辦事處傾；另一方面，波哥亦鬧埋班政府官員，話如果班官肯遊少啲花園，有錯就認嘅話，泛民都唔會搞咁多嘢啦！波哥睇來做咗主席一排，訓練有素，Jenny聽你咁樣兩邊各打五十大板，其他人都應該收貨嘅！

 

議會打風咁 波哥頂硬上

 

　　講講吓，波哥又嚟料，有啲沾沾咁話其實自己「都唔係好想做」主席㗎咋！皆因做主席真係「死咗唔少心血」，仲要成日夾咗喺政府同泛民中間做「磨心」，佢都「好想」畀其他同事試吓坐呢個位喎！之不過而家嘅議會「好似打風咁」，咁就只好「當仁不讓」啦！

 

　　呢個時候，坐喺隔離嘅副主席田二少田北辰冇反眼不特止，仲即刻講返句「衷心咁覺得主席係公平嘅」，唔知波哥有冇頓感老懷安慰呢？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

WoW WoW星期三：健康網購產品低至$99 (只限今天)► 立即行動