今日朝早天氣焗到暈，就嚟打風就滿天烏雲。近日社會怨氣咁深，瀰漫住一股低氣壓，係時候要有啲正能量去Cheer Up大家，咁啱嘉華主席呂志和搞嘅「呂志和獎─世界文明獎」今日(22日)就公布第二屆嘅得獎名單，當中「正能量獎」由Jenny都非常印賞嘅國際殘疾人奧林匹克委員會奪得！真係非常振奮人心。香港有不少殘疾運動員都屢獲殊榮㗎！

 

 

「呂志和獎」今年第二年頒獎。

 

劉遵義望傳媒「高抬貴手」？

 

　　「呂志和獎」今年都係第二年頒獎，同世界知名嘅諾貝爾獎當然唔能夠相提並論，但共通點都係表揚對社會同人類福祉有貢獻嘅人或者機構。獎項推薦委員會主席劉遵義都係咁同我哋講，話希望各位傳媒「高抬貴手」、多啲幫手宣傳喎！嗯……劉教授，「高抬貴手」好似唔係咁用㗎喎！

 

　　我哋都係睇返今年「呂志和獎」先，獎項分咗三個類別，有「持續發展獎」、「人類福祉獎」及「正能量獎」，而且每年呢三個類別都有佢哋嘅關注領域，所以評審準則可以話係年年有啲唔同。當中「正能量獎」今年就係關注領域「促進不同群組之間的和諧」，最後由國際殘疾人奧林匹克委員會奪得。

 

向世人證明身體殘障都可以係英雄

 

　　國際殘奧委會以推廣殘疾人運動發展為己任，一直致力團結世界各地的殘疾運動員，鼓勵佢哋積極參與各項國際性體育賽事，改變咗社會長期對殘疾人嘅睇法。Jenny非常同意大會讚揚國際殘奧委會同殘奧通過運動，為好多人燃點咗希望，令無數不可能變成「可能」，營造咗巨大嘅正能量。咁多年來，殘奧會透過殘疾運動員卓越嘅成就打破咗障礙，建立咗一個更共融嘅社會。即使身體殘障一樣可以為國為港增光，一樣可以係英雄！

 

　　今年「持續發展獎」嘅關注領域係「預防氣候變化」，就由促成《巴黎協定》嘅解振華獲得。不過可惜呀，侵侵(Donald Trump)一上任就話唔玩，仲記得Jenny睇新聞嗰陣不知幾惋惜。而家天氣咁反常，好大原因都同溫室氣體大量排放有關，雖然侵侵唔玩，但Jenny都希望其他簽署國可以繼續遵守減排協議。

 

《巴黎協定》侵侵唔玩又如何？

 

　　 而「人類福祉獎」嘅今年關注領域就係「脫貧」，由國際非政府組織Landesa(蘭德薩)農村發展研究所奪得。大家可能對呢個組織可能比較陌生，其實一直以來，佢哋喺全球多個地方，以脫貧為目標，幫助當地貧農開發土地同保護土地權利，當貧農「耕者有其田」咁就可以脫貧同逐漸經濟獨立喇！

 

　　「呂志和獎」每個類別都係只得一個個人或者團體得獎者㗎咋，換言之即係冇得共享獎項。得獎者會有2000萬獎金，相比佢哋為呢個世界做嘅貢獻，都真係小小心意Only咋！同場大會公布埋下屆「呂志和獎」嘅關注項目。持績發展獎方面，會關注發展可再生能源、人類褔祉獎方面，將關注降低天災嘅影響、正能量獎則會專注於掃除文盲。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新etnet健康網購，送你【健骨維他命D3(1000IU)】乙樽(價值$108)► 立即行動！