土地問題大家都好關心，而特首林鄭月娥嘅第一份《施政報告》都用咗好大篇幅講呢個問題。不過Jenny深明「世事無完美」呢個道理，所以各大機構先要不斷提建議畀政府呀嘛！而今日Jenny就去咗團結香港基金搞嘅土地房屋政策研究記者會，睇吓佢哋對香港嘅土地同房屋政策有咩高見！

　　其實團結香港基金每年呢個時候都會發表一份土地房屋政策研究報告嘅，今年已經嚟到第３份喇！不過Jenny睇返，其實今年呢份報告好似又同上兩年冇咩分別噃！連基金嘅總幹事鄭李錦芬都話，今年份報告同之前嗰啲都幾相似，只係再深入啲咁話喎。

　　叫得做研究報告記者會，Jenny 都預咗唔會有趣得去邊，佢哋除咗一直提返之前講過嘅「補貼置業計劃」（即係以建築成本定價出售公屋單位，並鎖定補價金額）之外，就係講填海。當Jenny就快瞓著嘅時候，就聽到有份做研究嘅港大經濟學教授王于漸分享「發達秘方」噃！Jenny梗係嗱嗱臨彈起身聽吓先啦！

估唔到王教授一副學者樣，講嘢都幾gag！

　　原來係有記者問佢呢個「補貼置業計劃」到底有咩著數。王教授就先賣個關子，同大家分享有咩方法可以發達。佢話：「窮人想發達得５個方法」，第一個方法係勤力讀書，但係就唔係個個都讀得到嘅；第二係創業，但係就仲難過讀到書；第三係炒股，不過炒股都係輸多過贏，同埋炒股票就同揀老婆老公一樣，唔需要自己叻，只要自己認到對方係叻嘅，揀啱老公老婆咁就得喇！眼光好，好過自己努力吖嘛！呢個比喻引到唔少行家都笑咗出嚟，Jenny都估唔到身為學者嘅王教授咁幽默！咁第四個方法係咩呢？原來就係買樓，又唔使讀書又唔使創業，連股票都唔使炒！但係Jenny就覺得，而家樓價咁高，呢個唔係最難嘅方法咩？唔知王教授係唔係聽到Jenny嘀咕，佢突然話鋒一轉，話：「不過而家四個方法都斷晒，咁就剩返第五個方法，就係去『搶』喇！所以呢個計劃嘅著數就係唔使去搶」。佢仲話，個計劃可以幫你攞到資產，等你百年歸老之後留畀仔女老婆，「咁就入土為安都可以好安樂喇！」此話一出，又爆出一陣笑聲，Jenny都差啲笑到標眼水！聽到王教授短短十分鐘就爆咗咁多金句，真心覺得佢如果唔做教授嘅話，可以考慮吓去做棟篤笑呀！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》青少年不可以戀愛！？真實個案講述驚心動魄經歷► 即睇