「娥六招」推出之後嘅首批52折居屋今日終於攪珠啦！大家係唔係已經期待已久呢？Jenny有唔少姐妹都有入表試下運氣，話晒而家抽居屋就好似買六合彩咁，抽到其實都好渺茫！

快啲嚟睇下自己有冇份！

　　今期攪出嘅號碼係：38、70、29、34、01、86…… Sorry，係冇特別號碼嘅。房委會資助房屋小組委員會主席黃遠輝都估計，今次綠表去到第6個冧把都有機會揀樓，而白表就可能抽到第3個已經未必有……

就算有頭籌 都未必有樓

　　不過有個殘酷嘅現實話畀大家知，就算抽到頭籌，都未必真係揀到樓！講緊嘅係白表單身人士。由於今次居屋係第一次有52折，又曾經開放重新申請，所以申請人數好似坐火箭咁飆升，收到破紀錄嘅27.2萬份申請表，即係超額認購60.4倍！而當中綠表有3.6萬份，白表有23.6萬份。100個冧把即係分咗100組，等於每個冧把綠表有360份、白表有2360份，而今次三個新居屋項目夾埋都係得4431個單位，按綠白表1:1咁分，即係綠白表每邊有2216個單位。

　　去到呢到，綠白表就會分別排隊，正如上面所講，於每個冧把綠表有360份，即係話去到第6個冧把「86」，都仲有機會揀樓，甚至第7個冧把「91」都仲有啲「籮底橙」睇下；相反白表單身者就慘喇，23.6萬份申請入面，有14.55萬份係單身申請，即係一個冧把都有1455個單身人士申請，但係單身配額得400個，分開埋綠白表，即係白表單身配額得200個，所以話就算抽到頭籌，都好有可能冇份！Jenny都戥佢哋唔抵呀！至於會唔會加返多啲單身配額數量，黃遠輝就話，雖然單身人士申請人數相當多，但同時都有好多家庭申請者，房委會需要整體考慮房屋資源分配嘅問題。睇嚟即係冇乜機喇……

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情