過往專欄

2018-12-06

天文台、公民教育委員會齊出月曆靚相VS「癲噹」揀邊樣？

　　2018年剩返唔夠一個月，大家準備定下年嘅月曆未呢？Jenny貴人事忙，冇返個月曆擺喺枱頭真係唔得掂！不過，月曆雖然唔係拎出街，但都唔可以是是旦旦嘅！Jenny今日就同大家開心Share下政府將會推出嘅月曆，有得揀免費同收費，你揀邊樣？

「癲噹」夠Cute仲免費派

　　第一個就係由民政事務局同埋公民教育委員會製作嘅年曆，今年佢哋再度邀請本地動漫創作人陳宇峰（John Chan）為年曆設計插圖，透過繪畫卡通「癲噹」同親友們相處嘅逸事，表達今年年曆嘅3個主題：「尊重與包容」、「負責」同「關愛」。

　　阿John仲話，啲插畫貫徹「癲噹」故事嘅幽默，以溫馨手法帶出核心公民價值。例如2月嗰一版係以農曆新年作背景，提醒大家可藉着拜年關心長輩，凸顯關愛嘅重要性；3月就描繪「癲噹」與朋友相處，帶出每個人都會有唔同意見，透過尊重與包容，就可以做到和而不同；而12月就加入埋環保信息，鼓勵大家聖誕交換禮物時用返環保包裝或轉贈舊禮物，展現「負責」呢一個公民價值。

　　重點係！呢個年曆係免費派發㗎！Jenny就收到風，派發地點包括18區民政諮詢中心、公共圖書館、各區大會堂、香港文化中心、香港歷史博物館，同埋喺柴灣嘅青年廣場7樓公民教育資源中心，先到先得！不過冇時間去拎都唔緊要，個月曆係設有網上版，大家可以喺聽日（7日）開始喺公民教育委員會網頁（www.cpce.gov.hk/calendar2019）到下載就得喇！

天文台月曆相高質附送有用氣候天文資料

　　第二個就係天文台推出嘅月曆，用咗之前舉辦嘅「風雲際會」天氣景象「海、陸、空」全接觸相片及影片徵集活動，同埋第二屆「銀齡的天空」天氣拍攝比賽嘅部分獲獎作品，而封面就係由香港攝影愛好者拍攝、獲世界氣象組織收錄喺佢哋2019年月曆入面嘅「陽光橋」。每張月曆相都設有QR Code，方便讀者查看有關資訊。月曆同時都刊載咗有用嘅氣候同天文資料，包括每月氣候資料同埋特別氣候事件、日出日落時間、月出月落時間、日食月食出現日期，仲有潮汐漲退等等。