收藏文章 

2019-01-10

林鄭一句辣著全體立會議員 跨黨派激到紥紥跳

  又到咗特首答問大會嘅時間喇!每逢呢個時候都係立法會議員搶分嘅機會,質詢質得應就證明自己做到嘢呀嘛!嗱!呢排社會最大爭議就應該係長者綜援年齡由60歲加到65歲,無論建制泛民都唔Buy,大家都儲定唔少子彈諗住今日發炮。點知全部立法會議員就被特首林鄭一句辣著咗!

 

 

 

蝦老人家? 林鄭:又係你地批嘅!

 

  是咁的,今日第一個問呢個問題嘅,就係新民黨容海恩,佢就問特首會唔會收回提高長者綜援申請門檻年齡嘅安排。林鄭就話,「呢個將申領長者綜援年齡由60增加到65歲係各位批嘅!」,所以佢自己聽到(議員反對)都覺得好驚訝喎!

 

各黨派齊喊冤 民記都話被屈

 

  林鄭呢一句就激起千層浪。個答問大會一完,各黨派嘅議員都衝晒出嚟「申冤」!尤其係專做勞福議題嘅工黨張超雄(阿Fer)。阿Fer就講返其實佢上年喺立法會福利事務委員會已經動議要擱置呢個安排,當時委員會亦都通過咗,咁就證明咗立法會嘅立場啦!

 

  連Die-hard Fan民建聯(民記)都嬲豬到即時出嚟炮轟林鄭將議員支持通過《財政預算案》,等同咗同意調高長者綜援申請年齡,係「屈建制派」、唔公道咁話!嘩!Jenny都好少可見到佢哋咁快手㗎噃,事關平時就算政府做咗啲好有爭議嘅嘢,民記就算唔撐,都唔敢鬧得咁大聲,之不過今次關乎一眾「年輕長者」嘅福利,票倉呢家嘢啦喎……你懂的!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

更多言歸政傳文章
你可能感興趣
#民建聯 #立法會 #特首 #長者綜援 #泛民 #建制 #申請門檻 #張超雄 #年輕長者 #答問大會
編輯推介
即時報價
全文搜索
Search
最近搜看
雙幣交易
財政預算案2024-25
More
Share