特首林鄭月娥一上任講話要「改善行政立法關係」，上任冇幾耐都叫有啲成效，至少以前唔肯請梁振英去黨慶嘅民主黨，上年都有請林鄭出席，林鄭仲即席捐咗大嗱嗱三萬蚊添呀！仲Hashtag埋「#大和解」！之後引發嘅一段小風波就後話啦！

林鄭唔請、鄭若驊唔請、梁君彥都唔請！

　　Jenny早前聽聞民主黨前幾日都仲諗緊今年繼續請林鄭出席㗎！唔知係唔係關噚日林鄭個「議員批准論」事，民主黨中委會噚晚開會討論邀請黨慶嘉賓安排，就決定唔會請林鄭、鄭若驊同埋梁君彥嚟飲喎！

　　不過黨主席胡志偉今日就講返，係因為大家見林鄭上任以嚟，淨係掛住「一國」而輕視咗「兩制」，冇為香港人嘅價值企硬，所以今年就決定唔請佢嚟喇！但係志偉認喺黨入面，對於請唔請林鄭的確有唔同意見，不過既然黨中委決定咗唔請，相信黨友都會支持呢個決定。

因咩解究民主黨嬲嬲豬 ?

　　至於點解鄭若驊同梁君彥都「上榜」？志偉就話，鄭若驊上任到而家都冇妥善咁處理佢僭建嘅問題，再加埋大家都好不滿佢喺UGL案嘅做法；而唔請梁君彥就因為不滿佢主持立法會嘅手法，覺得佢係「有權用盡」，而且佢哋黨嘅林卓廷同尹兆堅惹上官非一事，某程度上係因梁君彥嘅主席裁決而嚟，所以就決定唔請佢哋喇！

　　Jenny就覺得，姿態呢就點都要擺吓嘅！就咁睇嚟林鄭嘅「蜜月期」過咗，好多嘢都打回返梁振英時代嘅原形，至於仲有冇「改善行政立法關係」呢支歌仔唱呢？Jenny就當然常備花生恭候啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情