之前消防處嘅吉祥物「任何仁」風靡全港，唔少市民仲因為佢無意中學識咗點做心肺復甦法同埋點用自動體外心臟去顫器（AED機）。今朝「任何仁」就去到立法會，親自向各位議員同職員示範添！

「喺立法會工作係高危嘅！」

　　呢個咁有意義嘅活動，作為立法會主席嘅梁君彥就梗係要出嚟講兩句喇！佢話今次活動大家都好積極參與，有過百人報名，立法會都要加開講座畀大家，講笑咁話：「可見大家都覺得喺立法會工作係高危嘅！」咁又係呀，Jenny日日喺立法會睇住各位議員劍拔弩張個樣，有時都幾擔心佢哋嘅身心健康。

　　而消防處處長李建日就話，今日嚟到立法會搞講座，係希望借各位議員之力，向市民宣傳急救知識。他又話希望其他企業、大廈可以學立法會咁，有成9部AED機Stand By，「議員喺邊都梗係有一部喺左近」，咁個安全就一定做到最好喇！

一大班人一齊搓 何其壯觀

　　可惜呢個講座係閉門進行，Jenny同行家們就冇得親眼睇「任何仁」嘅示範。不過Jenny就見到民建聯劉國勳就喺Facebook上載咗佢哋跟「任何仁」學嘢嘅片！小妹睇到劉生做心肺復甦法嗰時，比起其他同事更「落力」，不禁有啲擔心第時佢救人嗰時，會唔會唔小心搓斷人哋嘅胸骨㗎……？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情