收藏文章 

2019-03-15

林子健畀官當面鬧「自編、自導、自演」?民主黨仲夠唔夠膽攬?

  前年民主黨成員林子健聲稱被內地人員擄走兼用釘書機釘大髀一事,相信大家都記憶猶新。唔覺唔覺,呢件事都已經發生咗一年半,結果林子健被控「明知地向警員虛報有人犯罪」罪名,單案今日就宣判,裁判官最後裁定佢罪名成立,要入監5個月,但就有得保釋等上訴。

 

 

 

劇情峰迴路轉

 

  當時民主黨神神秘秘咁話要開PC,仲講到好大單嘢咁,Jenny同眾行家都如臨大敵,聽完個內容更加嚇咗一跳,事關今次係關係到內地人員跨境行動噃!點知隔咗無幾耐就爆出有CCTV片段影到一個衣著步姿都同佢好似嘅男人,獨自係佢所指嘅事發地點戴帽遮樣離開。劇情咁峰迴路轉,Jenny記得當時唔少行家都聽到O晒嘴!

 

林子健:寧死不屈

 

  其實今朝未宣判,大家都心中有數。不過林子健就一直堅持自己冇虛報、寧死不屈,喺宣判前一晚亦都喺社交網站發文,列出案中疑點同埋講返一份CCTV嘅專家報告,仲話最有趣嘅係「香港公安找跟我身材相約的PC8x8x穿我的衣服,並模仿八字腳的照片,借此來引證那些方(衣)服是我本人。可笑是PC8x8x帶起口罩,穿起我的衣服,並模仿八字腳時,與那冒充我的人十分相似。」質疑香港警方都咁易搵到個警員模仿佢,咁佢被人冒充陷害又「有何難哉?」

 

裁判官:自編、自導、自演

 

  不過呢份專家報告,控方係冇呈堂嘅,但係裁判官喺裁決嗰時就話,雖然法庭無法睇到戴口罩男子嘅容貌,但係從衣著、外型、服飾、背囊同埋內八字步姿可見,戴口罩男子必然係林子健,亦都質疑林子健話太陽穴被襲擊,但係冇傷痕,又冇被迷暈過嘅跡象,話林子健今次係「自編、自導、自演」喎!

 

  林子健喺未裁決之前就講明會上訴,唔知日後有冇推翻嘅可能喇!不過Jenny就諗起電影《出埃及記》台詞:「原來呢個世界入面有一啲嘢,荒謬到某一個程度嘅時候,就冇人會信,但唔代表唔存在。」到底呢單案屬唔屬於「呢啲嘢」呢?可能就要拭目以待喇!但民主黨之後仲會唔會攬佢?以Jenny觀察所得,一眾白鴿講起佢都好小心,攬?以乎就難啲喇!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

更多言歸政傳文章
你可能感興趣
#林子健 #民主黨
編輯推介
即時報價
全文搜索
Search
最近搜看
雙幣交易
財政預算案2024-25
More
Share