前經濟發展及勞工局副秘書長馮永業涉貪案唔知大家有冇留意呢？單案今日就喺區域法院裁定表證成立，馮永業就會喺下午自辯。雖然高官涉貪本身已經夠令人震驚，點知更令人震驚嘅都唔係呢樣……

馮永業涉貪表證成立 

　　講返少少背景先，馮永業本身已經係高官，而佢老婆當然都有返咁上下，係民政事務局前常任秘書長、現任政策創新與統籌辦事處（創新辦）嘅總監馮程淑儀。所以行家們對佢哋嘅事點會唔上心！其實，馮太之前係因為以低於市價同賭王何鴻燊三太嘅阿妹陳婉玉「換樓」一事疑有利益衝突，點知查查下先發現係馮太個老公馮永業同陳婉玉有來往，ICAC就起訴佢哋兩人涉嫌貪污同埋公職人員行為失當。之後大家仲發現，馮永業同陳婉玉個「來往」，原來係疑似超越友誼嘅存在㗎！當時可謂震驚政商界!

Keep咗十幾年「唔敢畀老婆知」

　　雖然呢單料已經爆咗出嚟一段日子，不過今日又因為法庭審訊嘅緣故，再放上檯「鞭屍」。是咁的，控方證人嘅廉署首席調查主任李景成就喺庭上面講返馮永業喺接受調查時講咗啲乜，原來馮生已經覺得同陳婉玉「好似夫婦，除咗冇名份」，仲話呢段關係已Keep咗十幾年，仲講到明「唔敢畀老婆（馮程淑儀）知」。

　　馮太咁多年以來被蒙在鼓裡，當時馮生仲將老婆名下層樓同陳婉玉交換……真係「貴圈真亂」啊。Jenny腦內即刻響起「閉起雙眼你最掛念誰，眼睛張開身邊竟是誰」～～～～～其實你如果鍾意咗第二個，不如都係早啲放生現任好過啦！至於變咗心嘅男人，姊妹們當然係早走早著啦！一次不忠百次不用！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》如何搞好家庭關係？關係破裂幾時要放手？修補關係切忌讓XX充昏頭腦！► 即睇