今日係DSE放榜嘅大日子，Jenny晨咁早就去咗喇沙書院守住，皆因喇沙上年出咗個「終極狀元」！今年依然豐收，一門三狀元，係包攬得最多狀元嘅傳統名校。去到記者會嘅時間，老師仲要一連拉咗24個同學仔出嚟，原來24個都係考到42分，即係6科5**或者7科5*以上！望住個個張成績表上面都咁多粒星星，Jenny都數到眼冒金星喇！

喇沙成造星夢工場

　　而家去到邊都講緊《逃犯條例》，新鮮出爐嘅狀元們當然都被啲行家追住嚟問點睇啦！咪狀元真係狀元，唔係讀死書，高材生都好關心政治，仲識Find the right word。有狀元認為政府應該講明「撤回」而唔係「壽終正寢」，有狀元就贊成成立獨立調查委員會，喇沙嘅蕭子聰同學仲同Jenny講咗自己都有上街遊行和平表達意見。

　　人人都想學醫，你估人人都可以做到醫生咩！不過今屆狀元就應該唔使愁，揸住咁多粒星，去邊都應該通行無憂。今屆大部分狀元都話想學醫，雖然有言「學醫救不了中國人」，此言差矣呀！香港醫療資源緊絀，香港人好需要醫生呀，Jenny代香港嘅醫療體系多謝你哋！加油呀！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情