加入最愛專欄  收藏文章 

2019-10-17

【中女的感情漩渦】寧棄富二代,都要死在心愛的人手上?

  「又冇車搭,又冇工開,生活艱難呀!」她幽幽地歎息。

 

  「咁你同我一齊生活啦,我會照顧你嘅一切,包括兒女、愛犬、供樓etc……」他豪氣地承諾。

 

  「你真係人蠢無藥醫!」她聲調突然變得強悍。

 

  「有幾蠢呀?愛一個人都要被丙?」他好委屈。

 

  「有生路唔行、行死路,咁仲唔蠢!」

 

  對方笑爆,然後說:

 

  「咁拒絕法,都幾新鮮!」

 

  「你要嘅話,大把女撲上嚟啦。」

 

  「係囉!唔少靚女都(舌累)飯應。」

 

  「可惜樓下惠康曾經連米都賣清,我(舌累)唔到飯添。不過你有一噸女人吼,唔駛揀我噃。」

 

  「你係女人,唔係女仔。」

 

  「你係咪影射我老先?」

 

  「唔敢,想死咩!」

 

  「我雖然四十幾歲,有大把市場㗎。」

 

  「我知,剩係我已經好欣賞你嘅霸氣、生氣、仙氣、義氣……」

 

  「夠咧!你不如去搵小鮮奶啦!」

 

  「我明知佢哋只係鍾意我啲錢。如果我要死,都死在我愛嘅人手上吖!」

 

  「你究竟鍾意我乜啫?」

 

  「同你傾偈好開心。」

 

  「咁大家做開心朋友好啦。唔傾咧,否則收你聊天費。」

 

  她關了手機,望一望身旁自己心儀的男人。

 

  「邊個嚟㗎?咁曖昧嘅!」他問。

 

  「佢話要十萬蚊一個月包起我喎。」她如實答。

 

  「乜人嚟㗎?」

 

  「富二代,身材普通、樣貌普通、身家唔普通,有好多億,追咗我十年,一年加一萬話包我,升幅跑贏通脹。喂,你有乜反應呀?有冇少少妒忌呢?」

 

  「冇反應喎,你都話係死路一條咯!」

 

  「我明白人係要求生嘅。嗱!食多幾塊雪花肥牛啦!」

 

  她一面將鮮紅花白的牛肉放在他碗中,一面思考怎樣才可以死在心愛的男人手上。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多玄來更精彩文章
你可能感興趣
#玄學 #兩性關係
編輯推介
即時報價
全文搜索
Search
最近搜看
25周年慶
脫歐鬧劇
More
Share