平日上網，大家有無留意有啲網站或者 app 會彈出你嘅社交媒體 profile picture 或者資料，然後叫你直接用社交媒體嘅 login 去登記其他服務？如果有，你社交媒體上嘅個人資料有可能已經被外洩。

　　出現以上情況，可能因為黑客成功偷取用戶社交媒體嘅登入 token（一個令用戶無需每次登入嘅認證）。用家如果貪方便或貪得意，同意以社交媒體 login 呢啲第三方服務，佢哋嘅資料就會被外洩。就好似無幾耐之前，數據公司「劍橋分析」（Cambridge Analytical）喺 Facebook 利用一個心理測驗作餌，成功獲取超過五千萬用戶資料，然後再有策略地向呢班人發放選舉廣告，嘗試影響美國選舉結果。

　　呢件事發生之後，Facebook CEO Mark Zuckerberg 話：「 Facebook 有責任保護好用戶個人資料。如果唔係，我哋無資格再為大家提供服務。」（We have a responsibility to protect your data, and if we can’t then we don’t deserve to serve you.）

　　的確，網上世界，用戶個人資料最為值錢，尤其對商家而言。當一家公司知道你嘅背景、喜好，將有助佢哋投放更多你感興趣嘅廣告／消息，從而增加佢哋嘅銷售。Facebook 自身亦係因為能夠提供精準嘅目標廣告投放服務，令佢哋嘅廣告收入源源不絕。

　　不過有專家指，即使世界上最先進嘅科技公司都難以百分百確保以社交媒體 login 第三方服務嘅安全性。正如之前 Google+ （一個 Google 嘅自家社交平台）亦因爲系統有漏洞，令多達 438 個第三方軟件獲得用戶個人資料。最終，Google 決定將整個平台關閉。

　　隨著網上／手機服務更多元化，例如跨行過數、外賣訂餐等，更多更敏感嘅個人資料將會被上載。所以大家可以預期更多更離譜嘅資料外洩事件將會發生。例如一次過洩漏近千萬客戶個人資料，然後半年後先公布。

　　作為消費者，暫時唯有靠多睇新聞、少㩒一啲不明來歷嘅連結同勤力啲轉網上服務密碼嚟自保。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》青少年不可以戀愛！？真實個案講述驚心動魄經歷► 即睇