加入最愛專欄  收藏文章 

2020-01-23

【員工何價】員工被炒公司出email公告天下?「善意」提醒會令公司得不償失!

 

 

好多亞洲人一出世就生活喺「唔」嘅世界,「唔好跑」、「唔準咁做」、「唔好玩」。「我大個要做畫家」,媽媽就會講「唔得,你要做醫生」。帶有負面嘅教導,令亞洲人較着重「follow the rules」。相反,好多西方國家嘅生活環境裏,都係一個鼓勵嘅世界,「you can do it」、「think out of the box」。「我大個要做畫家」,媽媽會講「好,明日帶你學畫畫」。正面嘅推動力,令西方人處事較有自信、創作力亦較好。出生於兩種唔同世界/文化嘅人,套用落公司工作上,效果可以好唔同。

 

早前一個有關Netflix嘅訪問,Netflix前Chief Talent Officer指,當有同事被炒時,公司會將其被炒嘅原因以email 方式公告天下,藉此提醒員工唔好犯同樣嘅錯,同時希望提升員工生產力,令公司可以專注培養最有價值嘅員工。有部分人十分支持呢個方法,覺得較直接有效率。但亦有人覺得好無情,數員工不是。其實呢種公司文化好難定對與錯,等如不同國家教育方式都冇絕對。但同事如何解讀呢封email、接唔接受呢種文化,就可能會對公司好大影響。

 

從公司角度睇,道出員工嘅錯處係希望提醒大家,能夠檢討自己不足之處,亦唔好喺同一個問題上再次犯錯,以提升員工生產力。但從員工角度睇,email嘅內容都係從公司角度出發,係老細單方面「你講乜都得㗎啦」、「有你講冇我講」嘅諗法,未必人人會明白公司嘅「善意」。一封簡單嘅email,會令本身對公司/工作已經有負面印象嘅打工仔嚟講,等同叫佢日日要活於一個更恐懼嘅環境當中。

 

其實公司最有價值嘅資產必定係員工,建立公司文化時應該係由下以上、由員工角度出發,而唔係由上而下、從老細自己角度出發。如果唔係呢種唔應該叫「文化(culture)」,而係叫「制度(rule)」。世界上冇一個人係「born to be your staff」,最有價值嘅員工必定要「培養」同「共同磨合」,但如果令員工喺太大嘅負面壓力下工作,就會變成「倒模」同「被迫接受」。

 

Email一刻間可能真係會帶來一定嘅「提醒」,但提醒過後所產生嘅問題、所建立出嘅新文化,就可能會令公司得不償失。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多我做Marketing文章
你可能感興趣
#職場 #打工仔 #員工價值 #被炒 #員工犯錯 #公司文化
編輯推介
即時報價
全文搜索
Search
最近搜看
新型肺炎
The power of love
More
Share