加入最愛專欄  收藏文章 

2018-04-26

「聯合國」公司之不平等對待,份糧包㗎 !(上)

  記得當日由一間華人當道嘅本地公司,轉到另一間集合各國精英嘅跨國企業,心情梗係興奮喇!過五關、斬六將,終於冧掂外國人interviewer,得到Offer正式踏入新公司。除咗冇辜負英文老師10幾年來嘅教導,仲覺得自己終於踏入另一個LEVEL,左手拎住名牌手袋、右手拎住PACIFIC咖啡,同來自各國嘅同事遊走中環,談笑風生,成為中環人之中嘅人上人!當然,而家睇返轉頭都覺得自己愚蠢,望各位見諒! 

 

  轉左新公司,新薯第一樣要做到嘅野就一定係同同事打好關係。第一次面對住咁多唔同國籍嘅同事,非英文母語嘅我一啲都唔騰雞,同事仲對我好好、好熱情添!就係咁樣,當年無知嘅我,面對各位滿面笑容、口講「welcome」嘅外國同事及上司就真係以為大家好chill好friendly。隨著時間過去,我先發現種族歧視原來好嚴重! 

 

 

  唔好睇外國同事對你有幾NICE,但其實佢地同其他辦公室同事一樣,都會埋堆放暗箭。只不過,佢地埋堆嘅方法係分膚色。試過一次casual friday當日,我發現全team所有外國同事都整齊full suit返工,只有本地員工casual上陣。奇怪之下,我向一個比較友好嘅外國同事查問。原來一個由我地team負責嘅project得獎,上司收到邀請函出席領獎典禮,而上司卻只將e-mail forward畀一眾外國同事,邀請佢地出席。至於本地同事呢?連得獎都唔知,唔好話收到邀請函出席領獎!我知,帶外國同事出去見人,先顯得貴公司國際化,畀人更專業嘅印象!但你咁樣問都唔問其他本地同事,甚至唔通知大家得獎事宜,係根本就唔尊重我地。(或者,佢根本唔需要尊重我地。) 

 

 

  又有一次,公司annual dinner,公司傳統大家都會飲到醉醺醺。散場嗰陣,uber嘅uber,夾的士嘅夾的士,大家相安無事返到屋企,翌日繼續準時返工。玩得咁開心,第二日返到公司梗係繼續閑談回味。點知就比我喺閑談之中,無意間發現原來上司好盡責。因為佢返到屋企,都逐一WhatsApp各位外國同事,確保大家安全返到屋企,之但係本地同事就冇收過上司呢啲「溫馨問候」。唔通你認為喺香港工作、住喺香港嘅外國同事,會好似遊客咁,唔識返屋企?定係你認為外國同事條命值錢啲,本地同事出咗咩意外都冇所謂,所以唔需要關心?還是都係同一句說話:「本地同事唔需要尊重」? 

 

  除咗呢兩個例子,仲有多個更離譜嘅事件下回再講。其實同外國人共事之後,我都開始明白老一輩點解咁排外!!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多花生味辦公室文章
你可能感興趣
#上班族
編輯推介
即時報價
全文搜索
Search
最近搜看
雙幣交易
聚焦兩會2024
More
Share