香港樓價持續高企，打工仔就算搵6-7萬一個月，都逃離唔到做「租租」嘅命運，年年被業主加租趕走。身邊同事有父蔭嘅，當然就被「蔭」咗；冇父蔭嘅亦一早深明時勢，為咗早日換得真正自由或顯示獨立，好多都早早就搬出嚟租屋四處飄泊。所以，租屋、搬屋對大家嚟講實在等同閒事，可以話講咗出嚟都冇人會理。但係公司有位同事，好似集合咗全香港服務業應有嘅好客態度咁，成日邀請大家去佢屋企搞housewarming。聽落就冇咩問題，但其實housewarming滿佈危機……

 

 

　　「9月28日，Jacky仔寒舍Housewarming派對

 

　　本人Jacky誠邀各位親愛嘅同事嚟我新居一聚，屆時小食任食、酒水全包，英超、歐聯無限重播，啤牌、麻雀一應俱全。各位大大亦可自擕各式電玩，只求當晚大家可以玩得盡興，為寒舍加點生氣，搞旺個場！有意者回覆WhatsApp報名！」

 

　　一個睇落簡單又開心嘅Message，係同事Group中彈出。有嘢食、有嘢飲、又有個地方聚腳講是非，最緊要係可以參觀同事屋企，好多人都回覆WhatsApp參加Housewarming。Jacky整理好參加人數及作最後confirm後，就一盡地主之誼買定食物同飲品招待大家，仲send相去個group度話期待大家嘅來臨添！

 

 

　　不過，美好嘅故事嚟到呢度。當大家以Emoji回覆Jacky嘅食物相後，Jacky隨即send出一個housewarming禮物list。Jacky一如既往好有條理咁將大家分組，吸塵機、熱水壺、焗爐、微波爐等等電器，都由唔同組別嘅人負責，貼心嘅佢仲同大家講「畀咗個list大家，你哋就唔使煩買咩做入伙禮物啦！」

 

 

 　　嘩！多謝晒你咁貼心！成件事根本係個局，佢突登double confirm哂大家嘅出席，仲特意表示已準備好相應人數嘅食物，先再將禮物list send出，就係為咗唔畀大家反口唔去。而送禮一事，其實一班同事都冇諗過兩手空空咁走上人哋屋企。只不過係打算買上去嘅野，同list中電器有啲差距。而且大家為咗要面，冇理由你夾我唔夾，最終焗住被逼就範。人無恥便無敵，housewarming最終勝出者非Jacky莫屬。但無恥之霸嘅貪婪又點會咁易滿足得到？Jacky再度出招，但點解中過伏嘅我哋，又會再次中伏？

 

　　（下回待續……）

 

Read more:：【女兒控上司】囡囡來公司「學習」，為何我反而覺得自己是零？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情