加入最愛專欄  收藏文章 

2019-05-03

【職場熱話】男同事約你單獨睇《三夫》係性暗示?職場男女關係要小心處理

  第38屆香港電影金像獎得獎者已經出爐左兩個星期,未睇嘅電影唔知大家有冇去補飛睇返呢?我自問就真係賽後先有興趣睇《三夫》,想睇吓身邊朋友極力支持曾美慧孜嘅演技係咪真係值得獲獎。不過,一套談性嘅電影,假如有異性同事約你一齊去睇,你會認為大家都係藝術上嘅交流,定關係上嘅暗示?

 

 

  又要帶一帶頭盔,被約者唔係我,而係身旁嘅一位女同事。女同事本身有男朋友,而同男同事都係一般「比較傾得埋計」嘅同事關係,所以對於呢個邀請,都唔知應該reject定accept好,所以就問我意見。嗯……聽落呢個中女問題好似又有啲撠手!

 

 

情景一:Reject

 

  有人可能話「唓,覺得老尷唔舒服嘅咪推左佢囉,最緊要自己舒服!」聽落又好似啱,但有時女人就係咁自尋煩惱!人地同你傾起套戲知大家都有興趣,好心約你一齊睇,你又扮上菜扮矜持咁推三阻四,做朋友都覺得你麻鬼煩喇!何況如果人地對你根本冇意思,純粹搵隻戲腳一齊睇套藝術片,但你又話套戲色情、又孤男寡女咁多多嘢諗,其實會唔會個腦有非分之想嗰個係你?再者,你有非分之想唔緊要啊,最緊要係你個「幻想」畀人知道咗,畀對方笑住澄稱「對你冇興趣」,到時咩形象都冇晒,搵窿捐都搵唔切。

 

 

情景二:Accept

 

  「咁麻煩!做個女漢子轟轟烈烈同個男人睇齣三級片囉!」嗱嗱嗱,女漢子唔易做啊!辦公室啲人幾十對眼又人言可畏,啲人一陣時身國際化Open ABC,一陣又聖女貞德上身,唔知幾時道德綁架你,周圍唱你有另一半都同男人出去睇甜片,「季度最佳淫婦」呢個銜頭仲唔講到下年?除咗人事上變成人哋嘅茶餘飯後話題,公事一樣大鑊。當啲風繼續吹,吹到去腦細耳中,「一個男女關係混亂,而且受眾人所笑」嘅女下屬,人際關係處理失當!做人態度失當!辦事能力唔方有水準得去邊!全個人生都錯晒!當印象分大減,到你想升職加人工就難上加難!

 

  最終,我同女同事的確花咗少少時間去傾應該點處理呢件少事。前思後想,左計右計後,寧願有份工、有飯食比面子重要。正想採取reject方案之時,大家突然醒起不如叫多幾個同事一齊去(即係我),話唔定可以解決呢個問題。結果,我就因為開咗關心一線而免費可以同同事睇戲,女人,真係又麻煩又多疑又貪心!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App
財智‧健康‧品味生活
【立即下載】
iOS版: http://goo.gl/5qT9Op
Android版: http://goo.gl/nc3xAn
更多花生味辦公室文章
你可能感興趣
#職場 #小薯 #三夫 #金像獎 #兩性關係
編輯推介
即時報價
全文搜索
Search
最近搜看
置業不是夢
More
Share