想退休快快樂樂，一定要擁有兩樣人生中最重要的條件：一、健康；二、財務自由（不等於發達做富豪！）。有咗以上兩項基建，其他就可逐樣添加上去，令人生更豐富更多姿多彩。

 

健康及財務自由乃達致快樂退休的兩大基建。

大富豪式的炫耀虛榮生活，絕不合追求安逸的優雅長者。

 

　　經常有人問我，退休應該投資甚麼？

　

　　標準答案：「鐵律：一、買盡政府年金；二、買盡銀髮債劵；三、再有餘錢，買具備以下條件的股票： A、業內龍頭公司； B、市場永遠都在，不因經濟升跌而有大影響；C、歷史悠久管理層具有長遠忠誠記錄；D、年年穩定派息；E、受政府政策保護。」

 

退休投資，「穩」字先行，首選政府年金、銀債及受政府政策保護又沒競爭的公用股。

 

　　做足以上三點，已經非常安全又安穩，理應無風無浪有足夠財務安全直至離世。

　

　　當然，先決條件是有一個自住又供斷了的物業。

　

　　但，人性，總是會貪心的。於是，又不時有老友問：「碌Sir，咁，應否買新經濟股及試更進取的投資，例如是買比特幣。剛剛聖誕爆升噃！」

　

　　標準答案：「投資第二鐵律——西瓜及蟹，唔識莫買！新經濟股乃是一個非常籠統的term，內容充滿你我皆不識的運作。新的事物，留返比新的人類去冒險。我哋筆退休金，絕不可冒任何風險！一次險都唔冒！」

 

所有號稱「高風險高回報」的投資，還是留給心中有個「勇」字的「智者」吧。

 

　　講到比特幣，小弟即時諗起童年時，日日落街市買餸，經常見到一個外表猥瑣中年男人，用紙箱搭起個平台，開其「魚蝦蟹」。次次有十數中年男女「媒」（音妹）非常投入落注，個個贏到哈哈笑，吸引不少買餸的家庭婦女旁觀。

 

比特幣有點「現代魚蝦蟹局」味道。

 

　　然後，當你又下注我又下注時，就會有人大嗌一聲：「有差佬呀！走鬼呀！」

　

　　所有蓆面的錢，就由猥瑣莊家掃走！

　

　　落注的良家婦女及師奶，喊都無謂矣！

　

　　比特幣並非由政府發出，冇任何中央機構監管，虛虛的，買空賣空，是否很似一群柴娃娃者在「搭雞棚」，大大聲狂叫：「嘩嘩嘩，又賺咗咁多喎！唔買就笨咯！」

　

　　於是，「塘水炒塘魚」，炒下高啲炒下又高啲。嘩，咁而賺錢，當然吸引大量貪心的人入局。就算精明者，也會諗：「騙局？This time is different！」又或：「反正咁多傻瓜接火棒，總之，我走得快過佢就掂啦！」

 

近日比特幣升勢真是令人「嘩嘩」聲，你可感覺到‘Too Good To Be True’這永恒智慧嗎？

 

　　聽吓國際大炒家、老孤狸兼末日博士魯賓尼忠告啦：「比特幣完全沒有用途及投資價值！」

　

　　總結，想快樂退休，切勿踩入不懂有不安全的投資陷阱。風險，就由膽正命平者去做「媒」好了。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇