早兩期講生病，相片嚇窒不少讀者。好，今期不如爆下料！

 

　　爆乜料？正是名人坐監秘料。

 

　　小弟交友無疆界，只要是正派，就可杯酒言歡。老友之中，有幾位是任職懲教署的「老監骨」，做咗幾十年，自然乜嘢背景囚犯都見過。

 

　　香港的監獄，正似一個微型社會。上至特首司長議員，中至律師醫生教師，下至一般白領騙徒及毒販古惑仔，真係乜人都有。甚至身家億億聲的富豪，「坐」過的，也不少。

 

監獄就是社會縮影，甚麼人都有，包括明星、高官、大富豪及各式專業人士。

 

　　昨晚與四位「老監骨」美食美酒聚，兩三四五杯到肚，當然有料爆！

 

　　A：哈，最近睇報紙，丁富豪又出事喇！早前坐左幾年，諗住佢咁辛苦，出返去必定一世唔想返嚟啦。但真係做慣壞手勢，最近又俾老廉拉咗，上庭仍不減其牙擦擦作風，官都照窒。丁友真係好過癮㗎。坐緊時，經常揚言，我坐監，窗外就望住屋企！返出去住屋企，望出窗外就係呢處，有乜分別啫！（富豪大宅正是在赤柱！）

 

監獄守衞森嚴，沒自由的生活，正常人極難捱。

 

　　B：另一丁富豪也過癮，呃咗富婆唔少錢，多就冇，十億八億必定有，都幾識走罅及識歎。竟然「包起」一個靚女律師，日日以「事務探監」為名，陪佢到冷氣房傾偈1小時。女律師有次笑笑口同我講：「每小時五千蚊，坐吓就得，都幾好賺㗎 ！」丁友如今放咗出嚟，對當日被判入獄好唔順，仍在搞嘢。唉……低低調調享福咪好囉。咁串，隨時阿爺整多劑佢歎。

 

不少富豪擅用「公務探訪」以在暑天涼冷氣。

 

　　C：名人坐監，阿頭為免麻煩，多數主張單獨囚禁。不過，經常出出入入又或者有坐過的老友俾意見者，多寧願選擇大倉。因人是社交動物，必定要有social life，否則悶到癲！呢呢，早年有個議員就精嘞，幾大住大倉。因佢喜歡踢波，日日可以工餘同囚友打場波，攰攰地，好瞓好多㗎！

 

單獨囚禁雖然安全，但沒有了社交生活，極易陷入抑鬱。

坐監也要講「融入」，應該繼續發展興趣，才可免渡日如年。

 

　　D：係呀係呀！有啲名人，只要你肯放下身段，可以在監內極受歡迎㗎。例如，早年有個練馬師入咗嚟，嘩，佢知名度又高，又多口水。碰啱十個犯九個賭，怎不日日當佢神咁拜？有秘聞聽又有賽馬知識學喎。當然，更重要係攞貼士。其實，監內賭風甚盛，班友乜都可以賭一餐。只要唔好搞事，我哋咪隻眼開隻眼閉囉！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情