加入最愛專欄  收藏文章 

2021-08-25

《MakeMoney》投資騙案新種類,加強認識免受罪!

  正所謂「邊有咁大隻蛤乸隨街跳」,成日見到好多新款投資打住「高收益、高回報、低風險」口號,事實上邊有可能做到?而且唔少仲係投資騙案,畀人講兩講就幾十萬咁送出去,真係隨時血本無歸,所以今集MakeMoney帶大家睇睇近期有咩新款投資騙案,避免墮入陷阱!

 

 

幫你投資加密貨幣,「朋友圈」炫富引你落搭!

 

(Shutterstock圖片)

 

  加密貨幣呢幾年間幾倍幾倍咁升,唔少投資者睇見就心動,不過買賣加密貨幣唔係就咁開個戶就得,又要搞下錢包、了解下幣種合約模式之類,又要先用現金兌換穩定幣再入場之類嘅操作,入場門檻真係高過人!所以有人睇中呢個商機,利用虛擬貨幣作為幌子,加上係微信「朋友圈」Show下跑車、名牌包包之類,引一啲唔識加密貨幣嘅投資者落搭。

 

  香港警方最近係本月18、19號一連兩日採取「燈火」行動,打擊一個本地犯罪集團,集團主要針對海外潛在受害人,以騙取加密貨幣。據警方指,騙徒會先指示受害人轉錢到佢地嘅電子錢包或者戶口,並訛稱係「幫你投資」;同時都會畀條Llink你下載所謂「官方應用程式」,入面雖然可以睇到你嘅戶口數字每日上升,令到受害人相信並不斷入錢,不過最後錢就梗係拎唔返,而騙徒呢個時候就鬆人,投資者先發現自己被騙。

 

  古有倫敦金,現有虛擬貨幣,所以幾時都話,投資嘅嘢就梗係自己動手動腳,就算交畀人幫手,都要搵一啲大型持牌機構,畢竟血汗錢咬開都有血有淚㗎!

 

股票谷歷久不衰,扮財演推股,實質係散貨!

 

(Shutterstock圖片)

 

  相信大家都試過自己嘅Whatsapp或者Telegram突然被人加入群組,入面有一啲自認係「股神」或者係某財演,向大家推介一啲股份低價買入,高價賣出。不過事實係,呢啲都係一啲「莊家股」操作,當股價升到高位時候就突然暴跌九成或以上,投資者就梗係一殼眼淚啦!

 

  通常呢啲群組都唔係一個人操作,而群組入面除左外來會員之外,仲有一班「做媒」嘅會員,猛咁吹噓「股神」有幾咁準確,已經幫自己賺左幾多錢之類,總之跟佢搵食就無錯!散戶聽到呢班「媒」吹噓之後,自然會開始相信啦!起初群組都會推介一啲股份令散戶拎到甜頭,之後就會重點推介一啲細價股,呢類股份嘅特點就係:股價係幾毫子至幾蚊之間;無乜點聽過,甚至無媒體報道過;成交量不高,每日只有幾十萬至幾百萬成交。

 

  當然,相信唔少後生仔,特別係炒開股嘅投資者,就唔會咁輕易上當,不過要多留意身邊嘅長輩,因為佢地未必有良好嘅投資意識,可能真係當呢類股票谷係「筍料」,正所謂「長輩好與壞,在乎溝通與關懷」,提提佢地唔好亂信陌生人啦!

 

打工仔變為客,家庭主婦都受害!

 

(Shutterstock圖片)

 

  求職騙案一直都存在,不過無諗到自己去打工最後變客人,仲要自己做埋投資,真係嚇死人咩!今年初警方先搗破一個犯罪集團,騙徒首先會開一個空殼公司,而且無營運數據,騙徒就會以公司名義以最少1.3萬港元招聘文員或辦公室助理,期間會收集大量個人資料,用以評估受害人嘅經濟能力。

 

  起初騙徒會要求受害人進行簡單抄寫工作,而詐騙集團其餘成員就會假扮同事,與受害人套料,了解下投資習慣之類,並會要求受害人必須係公司開設一個投資戶口,並吹噓自己係呢個平台曾經賺錢;之後就會陪受害人去櫃員機拎錢並轉交畀騙徒,受害人就會收到一個投資戶口號碼及密碼手寫紙條,並鼓勵受害人以公司電腦登入帳戶進行投資。

 

  最後當受害人要求拎返自己筆錢,但騙徒就話成筆數已經虧損晒,並即時解雇受害人,當中大部分人都無辦法拎返薪金。據警方統計,相信有67人誤墮陷阱,年齡介乎29至64歲,大部分都係待業或者係家庭主婦,受害人損失1萬至80萬港元不等,涉款一共約300萬港元。

 

撰文:李皆穎

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

更多Make Money文章
你可能感興趣
#理財 #MakeMoney #騙案 #虛擬貨幣 #股票group #求職騙案 #加密貨幣
編輯推介
即時報價
全文搜索
Search
最近搜看
雙幣交易
聚焦兩會2024
More
Share