相信唔少人近期打開話題並唔係問「食咗飯未？」，而係問「打咗疫苗未？」，疫苗被認為係可以抵抗新冠病毒感染嘅主要方式。呢個時候，沉寂已久嘅侵侵（特朗普）突然開聲，並表示：「無我，美國會死一億人。」而佢嘅第一任白宮新聞秘書Sean Spicer最新爆料，話侵侵會係2024年再次參選總統！

 

 

特朗普認叻，疫苗要歸功於佢？

 

　　侵侵鐘億認叻就係人都知，最近佢又向外界連環發炮，認為新冠疫情有改善，應該歸功於佢：

 

　　「如果唔係我執政期間研究出新冠疫苗，美國可能會有1億人死於呢種病毒，就好似1917年咁(西班牙流感)。」

 

　　不過，現實就係侵侵在任期間，美國官方統計數據顯示，有大約40萬人死於新冠肺炎；而侵侵落選之後，輝瑞及Mordena先將研究成功疫苗消息公布；而侵侵下台後，係佢執政期間合共交付1650萬支疫苗，遠遠未符合當時佢所承諾嘅2000萬目標。現任總統拜登仲加多句：「呢個數字真係令人沮喪。」

 

BioNTech次季料按年賺多82倍

 

 

　　另一邊廂，全誠都關注緊疫苗公司BioNTech，因為佢將會係今日稍後第二季度業績，分析師預期公司收入同比增長有82倍，而且今年以來累積升幅已經有近4倍，由80幾蚊美金升到而家近390蚊美金，有買中就真係FAT FAT囉！

 

　　另外一個消息就係，FDA計劃於下月初全面批准輝瑞/BioNTech嘅新冠疫苗落地美國，有分析指，如果疫苗緊急使用授權（EVA）轉為全面批准（Full approval)的話，好多大學同醫院、政府單位都會強制接種疫苗，等「群體免疫」可以更有效運行。

 

美企各出奇謀，力谷員工接種率

 

　　至於企業之間又點做呢？好似亞馬遜咁就絕不手軟，最近外媒報道，亞馬遜為鼓勵員工接種，就提供「Max Your Vax」抽獎活動，最高中獎額係50萬美元現金，仲有其他抽獎例如新車、酒店度假套票等等，合共18個獎，獎金獎品價值合共約200萬美金。

 

　　而超市巨頭沃爾瑪就玩另外一招－打針即收錢，今年5月，凡係打針員工就會立即獎勵75蚊美金；到7月就將獎金翻倍至150美金，而先前收到75蚊美金嘅員工都可以獲得補發。美國企業為提高員工接種率真係無所不用其極，如果我打完針都有現金獎拎，打10次啊唔該！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇