收藏文章 

2021-12-29

《Online有話兒》連登契媽不停沽特斯拉,今年ARK輸幾多?

  明明都係Friend底,點解要分手?講緊係有「連登契媽」之稱嘅Cathie wood不停沽售特斯拉股份,而今年契媽旗下Ark Investment嘅ETF竟然跑輸道指,究竟契媽點做到係美股大升期間而輸錢呢?而契媽更放下狠話,話自己隻基金為來五年複合增長率將達四成,係真唔係啊?

 

 

 

契媽不停沽特斯拉,稱係正常操作

 

  其實契媽同特斯拉創辦人馬斯克明明都理念相同,點解契媽要連番沽出特斯拉股份呢?最新消息係契媽旗下幾隻ETF合共沽出56295股特斯拉,價值約6160萬美元,自九月開始,三隻ETF合共出售236萬股特斯拉,目前仍持有約198萬股。契媽就話拋售特斯拉而兌換利潤,用於購買其他股票,並指呢個係正常投資組合管理。

 

  係咪正常操作我就唔知啦,不過契媽咁做係咪已經睇淡電動車發展呢?雖然特斯拉貴為電動車界龍頭,但好多油車大廠已經睇到電動車商機,所以已經落力著手搞開發,雖然呢排特斯拉已經再度破頂,但分析指公司股價已經脫離正常估值範圍,公司盈利未必再能支持股價發展。

 

ARKK今年跌兩成三,美股今年走勢強勁

 

 (SHUTTERSTOCK圖片)

 

  稱得上「契媽」,梗係有佢過人之處,皆因去年Ark Investment旗下隻ARKK ETF走勢強勁,有成150%升幅,不過今年就慘啦,截至昨日收報95.63美元,下跌1.83%,今年以來跌超過23%,同去年表現形成鮮明對比,亦都係基金成立以來最差表現嘅一年,有部分原因,係因為隻ETF曾經買入過部分中概股,當時契媽以為自己執平貨,點知最後都係損手爛腳。

 

  咁今年美股表現如何呢?道指今年全年大漲約一成八,納指升約兩成三,標指更飆兩成七,三大指數都係今年內不停破頂。雖然有人話過美股已經係歷史高位,已經預備要大跌,但未發生的事依然未發生,就算聯儲局吹緊風收水,美股好似都依然不動如山,唔通真係咁硬淨?

 

基金大跌契媽護航,稱現時進入「深度價值區域」

 

  (SHUTTERSTOCK圖片)

 

  對於自己隻基金下跌,Cathie wood表示,目前自己隻基金已經進入「深度價值 (Deep Value) 區域」,目前公司係調整期間,利用股份波動率,將資金集中係信心最大嘅股份之上。佢更指出,要判斷一隻ETF好唔好,應該係要觀察其長期表現,並指出以自己目前個投資策略,未來五年將會交出一個三至四成嘅複合年增長率,係真唔係啊?

 

  不過,契媽又認為,目前留意到通脹預期正在放緩,以及大宗商品價格普遍下跌,未來一年金融市場和經濟面臨嘅最大風險係通縮,而唔係通脹,並預計未來一年美國經濟增長會低過預期好多。至於大家信唔信佢就不得而知啦,不過契媽眼光獨到係真嘅,皆因佢買嘅比特幣同特斯拉,後來都有百倍增長,所以「契媽講話你要聽」啦!

 

撰文:李皆穎

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

更多Online有話兒文章
你可能感興趣
#理財 #Online有話兒 #特斯拉 #連登契媽 #Cathie Wood
編輯推介
即時報價
全文搜索
Search
最近搜看
雙幣交易
財政預算案2024-25
More
Share