呢幾日香江同花旗國魚缸幾乎都係同一命運，兩者都係創咗高位之後碌返落嚟，而香江魚缸破咗兩年前嘅大時代高位同創咗近十年新高後，加上前幾日施政報告冇提到農地政策，搞到唔少缸友都相當失望，趁機食胡散水，當中有唔少藍戰士「中招」，所以呢幾日炒上嘅板塊，不外乎都係一啲頹咗一排嘅股份，藍戰士入面就有聯想（００９９２）同瑞聲
（０２０１８），而國貨佬指數就係有基建鐵路佬。
　　若果要比較落後板塊，基建鐵路佬真係可以「坐亞望冠」，仲要有唔少街坊喺三月份創咗新高後就一路腳軟，中車（０１７６６）喺三月尾高見７﹒７４９銀後起計半年，即係上月尾，坐底跣低超過一成；中交建（０１８００）同樣喺三月底高見１１﹒５２銀後碌落山，以半年計，都跣低超過一成半。
　　不過，基建鐵路佬頹咗咁耐，亦都可以反映而家嘅估值都相當吸引，中交建今年預測市盈率只有７﹒２倍，平絕所有街坊。中車今年預測市盈率雖然都有成１５﹒８倍，高過晒所有街坊，但作為行業龍頭，加上今年訂單增長強勁，上半年有成６７５億人仔，按年升咗超過一倍，而早排公布嘅７至９月訂單都有２８３億人仔。
　　加上基建投資不嬲都係神州嘅經濟增長主要動力，「孖屐」預料會喺今年餘下時間會力谷鐵路建設投資，而基建鐵路佬都係反彈咗冇幾耐，相信後市仲有升勢。走勢上，中車喺上月底低見６﹒８１銀見反彈，至今已經累升咗近１１巴仙，「他屐」首先睇７﹒７４９銀。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇