道指噚晚（１７日）破頂，但今朝（１８日）呢邊魚缸低開６１點，磚頭同內銀都腳軟軟。中共十九大開幕，開到１０月２４日（即下個星期二），魚缸今朝都係觀望氣氛比較濃。
　　大唐新能源（０１７９８）第三季完成發電量高達３０６萬兆瓦時，按年多咗近３９巴仙。出咗營運數據之後，大行齊齊睇好，瑞信讚佢風電產量係街坊中最勁，相信可以繼續受惠棄風率進一步下降，將目標價升到１﹒２４銀，重申「跑贏大市」；美銀美林亦都將目標價升到１﹒４銀，話佢風電發電量遠超預期。
　　十九大開波，話唔定有環保政策出台，但要小心如果開完會一排都無聲氣就要走人，畢竟十九大概念完咗承接力會弱番，加上升破１蚊蟹貨位可能見沽壓，有貨等炒多幾日好走人！若果有環保消息，就一於繼續揸住先，睇政策力度再決定走唔走人！

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇