噚日（１９日）下晝魚缸失驚無神插咗超過６００點，香江磚頭同大隻藍戰士跌到一仆一碌，嚇到班缸友眼擎擎，但係其地地方嘅魚缸就冇乜點郁，加上今朝（２０日）跳彈床升返二百幾點，所以博客應該好似大時代入面丁蟹咁講：「唔駛驚，只喺技術性調整。」
　　雖然話係調整，但成個「孖屐」都好似冇乜聲氣，唔少缸友都期待十九大會唔會有Ｄ咩好嘢出台，個個都喺到等運到，搞到前排魚缸都係唔上唔落。不過，魚缸悶悶地，習老闆前幾日喺十九大再次強調，要搞好環保，要建設「美麗神州」，加上就嚟冬天，神州北方會有唔少人燒煤取暖，所以冬季一向都喺霧霾「旺季」，缸友都好憧憬喺推好嘢出台方面，會優先集中搞環保，神州環保佬近排都有啲炒作。
　　事實上，環保佬今年以嚟跑輸唔少板塊，其中，中滔環保（０１３６３）全程跑喺街坊後面食塵，今年以嚟插咗超過１８巴仙。中滔喺今個禮拜二突然爆上超過１４巴仙，而中滔股東近月係咁增持，反映股東對公司前景愈嚟愈有信心。雖然中滔舊年畀沽空機構狙擊話佢盤數有問題，搞到股價一直潛水，但勝在股價夠殘，今年預測市盈率都係得１１倍，如果有環保政策出台，話唔定有機會大幅炒上，所以短線值搏率都較其他街坊高。
　　不過，想穩陣啲，可以揀光大綠色環保（０１２５７），呢個環保佬今年五月先入缸，到而家都升咗超過二成半，表現十分靚仔。最重要嘅係，佢而家搞埋土壤修復，魚缸入面唔多街坊有涉足呢樣嘢，加上有阿媽光大國際（００２５７）撐腰，唔少大行都唱好，中長線就最值搏。


　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情