花旗國嘅紐約噚日（１１日）不幸地發生爆炸，未有為當地魚缸帶嚟太大影響，缸友們繼續觀望聯儲局議息會議，三大指數都有錄得升幅。睇返香江呢邊，雖然ＡＤＲ重上二萬九，不過今朝都只係高開７點，之後嘅走勢較為反覆。
　　博客今日就想同缸友們講下隻中生製藥（０１１７７），呢隻股仔雖然上半年平平無奇，不過去到第三季就開始發威，升勢都變得較為急促，吸引多咗人留意。而今日嘅走勢都成功跑贏大市，雖然大華繼顯同野村都相繼地唱淡，不過呢隻股仔有個強大嘅支持。
　　皆因德銀指出中資醫藥股仍然有上行空間，仲視佢為行業首選。而富瑞都話呢間公司嘅銷售同盈利前景佳，畀個１３銀嘅「他屐」，正啊！睇埋業務層面，截至９月底止頭三季嘅業績，純利方面有近四成升幅，可以睇到業務增長方面做得唔錯！
　　至於呢一兩個月走勢又點呢？睇返公仔圖，中生製藥自１１月中旬就開始反覆向下，不過喺上星期見過１０﹒０６銀低位之後，就回復返向上嘅趨勢啦，今朝仲創埋上市新高，有貨缸友要坐實啦！

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇