魚缸噚日（１３日）大升逾４００點，仲收復埋廿天線（２９２１２點）。噚晚花旗國又如期加息四分一厘，市場早已消化晒，今朝（１４日）香江魚缸都繼續高開１１３點，不過高位遇阻力，魚缸開始腳仔軟反覆向下，缸友們開心得一陣，又要重新面對現實。
　　睇返仔細少少，大隻佬ＡＩＡ（０１２９９）噚日並無跟隨大市一齊飛起，只係較再上一日（１２日）輕微彈起０﹒４巴仙，而今早更加係全程受壓。可能部分係因為，噚日有報道話，
ＡＩＡ有意縮減在台規模，而友邦人壽都證實，最遲出年２月底前終止與約３００名業務員的承攬關係。雖然話強調客戶保單權益唔會受影響，但缸友們始終都會擔心。不過好彩嘅係，呢類消息對股價應該都只係短期影響，博客覺得又不必過於憂慮嘅。
　　望返公仔圖，ＡＩＡ自上月中見過６９﹒１５高位後走勢就向下，不過自上周開始就稍見反彈啦。今日摩通仲出手送祝福，將「他屐」由８０銀大升至９０銀，維持「跑贏大市」評級。雖然現價同「他屐」仲有一段距離，不過長線嚟講，相信ＡＩＡ業務都相對穩定，有貨缸友唔好俾今輪嘅調整嚇親，可以先繼續坐實！

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情