魚缸風高浪急，今朝（１５日）表現又疲軟。由於歐美魚缸都下挫，令到香江呢邊亦跟隨，低開１６６點，無幾耐由於ＱＱ（００７００）、內銀、內險、本地錢莊全部偏軟，魚缸跌幅進一步擴大，再度穿廿天線（約２９０２４點），喺五十天線（約２８８５６點）附近爭持中。
　　上星期五（８日）博客推薦利豐（００４９４），事關唱淡利豐７年嘅瑞銀分析師梁裕昌都轉軚，將利豐他屐由２﹒９銀大升到４﹒４銀，當時博客就叫缸友入貨，嗰陣股價大約３﹒９銀左右，今日最多升到４﹒４７銀，缸友有入貨應該開心到笑啦！
　　利豐今日急升，主要係公司計劃出售業務，包括家具、毛衣同美容產品，所得會用嚟分派特別息，每股約０﹒４７６元，將會儘快喺交易完成（料於出年上半年）兩個月內分派。而大和就維持「掃貨」評級，他屐升至４﹒７銀。
　　不過呢，公司會因為單交易錄得６﹒１億美元嘅虧損，所以大和都削公司盈利預測。不過，查實公司出售後有剩餘資金，公司可以用作併購。此外，花旗國嗰邊會減稅，大和就預料可以令公司花旗業務見增長。
　　暫時股價一下子跳到４﹒４５銀左右，家陣大市氣氛唔好，資金又唔踴躍，加上利豐調整業務重新上路，效應需要好長時間先見效，缸友如果有貨，其實都不妨現價沽出，袋袋平安過聖誕。想收息嘅缸友，可以等交易完成先入返都唔遲！而想作長線投資但又無貨嘅朋友，就建議股價落返４蚊以下先買啦！

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇