12/03/2018 11:59

《魚缸博客》泡菜國產品創新勁搶生意,康師傅(322)難以憧憬

  上個禮拜環球「孖屐」都算係喺驚濤駭浪中度過,繼侵侵(特朗普)挑起貿易戰後,另一方面又擔心上個禮拜五(9日)花旗國公布嘅非農同薪金數據會唔會又再次觸發上個月爆發嘅小股災,但依家總算一天都光晒,香江魚缸今朝都終於再度重上三萬一,再加上仲有唔少藍戰士仲未放榜,缸友對後市嘅樂觀情緒都愈嚟愈樂觀。
  神州「兩會」舉行之中,「孖屐」除咗集中習大大任期之外,最關心嘅都係中央未來點搞好個經濟。神洲經濟依家主要依賴三頭馬車(投資、出口同消費),舊年嘅經濟增長入面,消費就貢獻咗近59巴仙,「兩會」就提到未來起碼要佔六成以上,並且要推進消費升級。
  喺上個禮拜,唔少內需股都有返d炒作,但芸芸股份中,揀得落手嘅股份真係唔算好多,皆因最具產品創新能力嘅,暫時就只有蒙牛(02319),昔日來自寶島嘅神州三大食品龍頭旺旺(00151)、統一(00220)同康師傅(00322)已經開始步入夕陽。
  曾經作為即食麵一哥嘅康師傅(00322),缸友無懼呢位過氣大佬銷售持續插水下,舊年股價依然升咗超過63巴仙,遠遠拋離統一同旺旺僅超過兩成嘅升幅。不過,既然康師傅舊年已經升咗唔少,加上佢喺神州即食麵「孖屐」嘅地位江河日下,今年嘅投資價值實在唔多睇好。
  事實上,自從康師傅個阿媽頂新喺寶島被人踢爆用地溝油之後,喺兩岸地區嘅即食麵銷售持續插水,加上神州食品「孖屐」不斷萎縮,康師傅喺2013年至2016年間,銷量急瀉超過
兩成半。
  再者,近年唔少老牌神州食品佬喺產品創新方面始終慢人一步,畀周黑鴨(01458)同達利食品(03799)後來居上,加上泡菜國即食麵產品令神州缸友眼前一亮,推出嘅辣味火雞麵成功搶佔中高端消費族群,舊年喺神州嘅銷量更加奪冠,泡菜國出口至神州嘅即食麵出口更加喺再創新高,達到近4億美金,仲搞到統一要退出即食麵「孖屐」。
  康師傅喺2013年即食麵嘅收入達到250億人仔,2016年只係得205億人仔左右,面對泡菜國嘅夾擊下,康師傅似乎都仲未有還擊之力,要重上20蚊以上水平似係遙不可及了。

  《編者按》本欄搜羅即市傳聞,惟消息未經證實,《經濟通》亦不保證內容之準確性。

全新etnet健康網購,送你【健骨維他命D3(1000IU)】乙樽(價值$108)► 立即行動!

魚缸博客
即時報價
全文搜索
Search
最近搜看
雙幣交易
財政預算案2024-25
More
Share