華爾街魚缸上周五（１３日）造好，本地魚缸今朝高開５５點，報２８５８０點。不過由於小米（０１８１０）遭滬深交易所拒絕納入港股通，加上科技佬無咩力水，連祖國次季ＧＤＰ增長都放緩至６﹒７巴仙，搞到魚缸調頭向下，碌低過最多近兩百點。
　　而有壞消息嘅魚毛就跌得更勁，好似丘鈦（０１４７８）真係跌得好厲害，全因為佢發咗個盈警，話今年首六個月可能會錄得虧損約５０００萬人仔，唉！雖然先前５月已經出過一次盈警，指出期內溢利可能按年減少約５０巴仙或更多，不過估唔到單單過咗兩個月，情況就變成要蝕咁多喇，所以今日上晝就已經急挫過最多１５巴仙。
　　丘鈦話主要係因為，人民幣兌美元匯率喺今年５月１０日至６月３０日期間大幅貶值，搞到外匯虧損多過預期，同埋因為攝像頭模組喺今年５月、６月份的實際銷售總量，都係少過預測，所以搞到要蝕咁多，慘慘。
　　見到份盈警，大行都唔留情面喇，野村就將「他屐」由７銀下調四成，去到４﹒２銀，而大摩都由４銀下調到３﹒５銀，兩位都齊齊維持「減持」評級。
　　其實唔少缸友都散水，不過相信有Ｄ大膽嘅缸友，會希望博反彈，或者想撈底。參考返野村同大摩嘅「他屐」，都係低過現價，睇嚟都仲會有得跌。而由於虧損牽涉匯率問題，可能短期內都難解決。博客奉勸各位，都係趁早離場為妙喇。


　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情