噚日（１７日）「三桶油」同內銀佬喺下晝愈跌愈急之下，魚缸尾市埋單前一度急跌４０１點，最終碌低３５７點，報２８１８１點，企穩咗兩日嘅十天線（２８４１９點）到最後都係守唔住。不過，魚缸今朝（１８日）就嚟個反彈，先高開１７０點，升幅仲最多擴至２０４點，雖然幾隻藍籌大隻佬升返，但魚缸升勢未能再繼續踩油向前行，冇幾耐升幅仲極速縮水，最多縮到去４６點低見２８２２３點，半日埋單前升幅不足１００點。成交繼續拍烏蠅，
４００億銀都不夠，成交咁少，魚缸都好難有突破。
　　事實上，魚缸近排都冇乜新嘢，來來去去都主要圍繞返貿易戰，加上所帶嚟嘅負面影響仲未浮現，嚟緊侵侵又唔知會唔會加碼，喺缸友嘅無限幻想下，好多股份都唔夠膽沾手，但內需股就成為缸友嘅避風港。不過，缸友都係主力炒作下同食品飲品相關嘅股份，其他日用品例如家電就備受冷落。
　　神州家電一哥海爾電器（０１１６９）走勢較為落後，由六月初高位２９﹒６６銀跟隨大市逐級回落，到上個禮拜四（１２日）跌至２３﹒３銀稍作喘定，之後仲上返條十天線
（２４﹒４１５銀），若果後市能夠進一步突破２０天線（２５﹒３７６銀），大致上已可以確認轉勢，有望修補返６月嘅下跌裂口。
　　話咁快就到業績期，海爾電器近年成績一Ｄ都唔算差，幾乎每年都錄得純利同收入增長，舊年就多賺近２１巴仙，總收入就彈高逾２３巴仙。事實上，今年以嚟唔少內房都交出省鏡嘅銷售成績單，加上三四線城市消費亦都持續增長，海爾今年上半年成績理應可以睇高一線。
　　花旗最新報告話，預計上半年海爾收入增長將加速至１９巴仙，純利踢高１４巴仙至１７億人仔，評級由中性升至掃貨，「他屐」由３２蚊升至３２﹒５銀。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇