《笑傲缸湖》相信大家平日都有好似盈盈咁發吓白日夢，想像自己有車有樓又年薪幾千萬，不過都只係天方夜譚。本身盈盈以為要做到大公司ＣＥＯ，先有拎到呢個ｌｅｖｅｌ嘅人工，不過真實例子證明，原來唔一定要做到最ｔｏｐ，都可以年薪幾千萬。講緊嘅就係獲聘為恆大集團首席經濟學家，兼恆大經濟研究院院長嘅任澤平！　　查實事前報有唔少江湖傳聞啦，話任澤平過檔去恆大後，年薪將高達５０００萬人仔。不過神州媒體就證實咗，內部文件顯示任澤平嘅月薪將會係１２５萬人仔，即係年薪有１５００萬！雖然無傳聞中咁誇張，不過都仍然稱得上為天價！　　皆因呢個年薪，已經高過好多明星企業家！望返舊年嘅數據，平保（０２３１８）董事長兼ＣＥＯ馬明哲年薪逾９６８萬人仔、萬科（０２２０２）董事會主席兼總裁郁亮年薪９７９萬人仔，通通都同任澤平將會得到嘅年薪差一大截！　　不過，講到「打工皇帝」，其實香江都有唔少例子，長和（００００１）聯席董事總經理霍建寧就最厲害，舊年年薪高達１﹒８７億銀，日薪５１萬銀相當於普通打工仔兩年半年嘅人工。睇嚟盈盈應該一世都無機會搵到咁多錢，不如踏實ｄ努力搵個好老公仲好啦！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新etnet健康網購，送你【健骨維他命D3(1000IU)】乙樽(價值$108)► 立即行動！