《笑傲缸湖》話咁快就到一年嘅尾聲，相信大家最近都開始見到唔少媒體製作全年回顧，影片分享網站ＹｏｕＴｕｂｅ都唔例外，喺噚晚上載咗一年一度嘅「ＹｏｕＴｕｂｅ　Ｒｅｗｉｎｄ」影片，回顧２０１７年嘅各個網上熱話同埋熱門片段，短短１２個鐘就有２２００萬個觀看次數，非常厲害！不過，除咗依條重頭戲之外，ＹｏｕＴｕｂｅ亦都公開咗今年最熱門影片排行榜，而當中嘅第一位嘅主角，居然係戴住生蠔面具嘅蒙面歌手！　　盈盈雖然都經常會上ＹｏｕＴｕｂｅ周圍睇下片，不過竟然無睇過。盈盈唔執輸即刻ｃｌｉｃｋ入去睇下，原來個片段係出自泰國版《蒙面歌王》，其中一個參賽者演唱「Ｕｎｔｉｌ　ｗｅ　ｗｉｌｌ　ｂｅｃｏｍｅ　ｄｕｓｔ」，由６月上載至今，已經累積咗１﹒８３億個觀看次數啦！　　首歌歌詞都幾有意思，雖然講述大家愛一個人嘅原因同動機都唔同，不過相信世界上係有最單純嘅愛。大家係咪諗緊點解盈盈會識泰文呢？其實係ＹｏｕＴｕｂｅ好貼心地已經加咗中文字幕上去啦，大家如果有興趣，不妨上去聽下首歌啦！不過，盈盈聽完首歌，諗緊自己唔知幾時先搵到真愛呢。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情