《笑傲缸湖》盈盈相信嚟緊呢一個月，條街上面都會有好多熊貓出現，事關今日世界盃就開鑼啦，而且幾乎每一場至少都係夜晚１１、１２點先開波，鍾意睇波嘅男士們仲使瞓覺嘅。盈盈雖然對足球嘅嘢一竅不通，每當聽一班男士們講嘅越位射罰球，盈盈都只會Ｒ晒頭，但盈盈同班姐妹都一樣會睇到好ｈｉｇｈ架，事關歐洲足球隊有唔少型男，而姐妹們見到德國隊嘅高大靚仔球員更心花怒放，睇嚟姐妹們喺嚟緊星期日（１７日）睇德國隊第一場比賽坐定定喺電視機前面啦。　　德國隊今次衛冕嘅決心同佢地今次帶嘅行李一樣咁大，事關佢地行李總共有成１２噸，入面除咗Ｄ體育用品外，其餘嘅都係食得同飲得嘅嘢，當然就唔少得德國佬嘅最愛香腸同啤酒啦，香腸加加埋埋重量高達７００公斤，而啤酒就有成１﹒８萬公升，薯仔就有３００公斤。　　不過，有球迷就好唔識趣咁話，都唔明做乜都帶咁多嘢，萬一你地喺小組賽好唔好彩比其他國家隊叮走，咁多嘢咪食唔晒囉！簡直係一盤冷水撥向教練路維身上。其實，唔止德國隊帶咁多嘢去架，拉美兵團嘅阿根廷同烏拉圭隊就帶咗佢地嘅土產茶葉－馬黛茶，而烏拉圭就總共帶咗１８０公斤去羅宋國。　　另外，近呢幾年嘅世界盃，盈盈都留意到有人會用動物去預測賽果，而２０１０年嘅時候，有一隻叫保羅嘅章魚成功喺１４場比賽入面，准確預測咗１２場賽事嘅賽果。隨住人工智能（ＡＩ）愈嚟愈勁，有德國嘅科學家就整咗一個模型，參考咗每隊喺ＦＩＦＡ嘅排名、人口、往績數據同平均年齡等，預測上屆爆冷喺分組賽出局嘅鬥牛勇士（西班牙）會拎冠軍，自己祖國只能夠拎第二。盈盈諗，就算拎唔到第一，德國佬都可以入決賽，即係話唔使驚個位球迷話會食唔晒Ｄ嘢啦，話唔定德國佬帶咁多嘢食，係預咗會衛冕成功呢。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇