《笑傲缸湖》「債王」格羅斯有可能犯太歲，今年一直以來行衰運。一向收藏咗唔少名畫嘅佢，繼早前被前妻魚目混珠，用一幅自己畫嘅Ａ貨畢加索名晝換走幅真貨後，「債王」老貓燒鬚過咗幾年先知，一度成為華爾街嘅笑話。之後，喺５月底意大利政局不穩之時，「債王」旗下嘅債券基金一度急插超過３巴仙，而隻基金今年以嚟嘅表現更加係跑輸唔少同類基金，搞到「債王」老貓燒鬚。　　除咗用「禍不單行」嚟形容「債王」之外，都好難再用其他形容詞去形容佢依家嘅狀況，事關作為一個有錢佬，一同人離婚就要同前妻分身家，前妻仲要攞埋「債王」一間喺加州最心愛嘅大屋。　　唔知係咪對「換畫」一事懷恨在心，「債王」竟然好似細路仔咁，不惜一切整臭間大屋，前妻喺接收呢間大屋嘅時候，只有一陣死魚同咸魚味，而且間屋仲「甩皮甩骨」，好似荒廢咗好多年咁。　　呢一間大屋大嗱嗱值３６００萬美金（２﹒８３億港紙），加埋之前個幅名畫，兩樣加埋總值都超過５０００萬美金，債王認真相當肉痛。據佢前妻所講，佢地離婚之後，「債王」利用「間諜軍隊」對佢同佢嘅家人進行無間斷嘅監控；而呢個指控都無話唔嚴重，睇嚟一代「債王」真係唔要出來公開回應一下啦。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情