《笑傲缸湖》前排官方開始打壓網遊之後，ＱＱ（００７００）股價坐過山車，曾經低見３０５銀，不過隨孖屐氣氛略為好轉，加上用到回購呢項絕招，股價先叫靠穩，一眾缸友先略為放心咋。　　ＱＱ近排都動作多多，除咗同瑞幸咖啡合作硬撼阿里星巴克之外，今次就因為捍衛自家制嘅ｅｍｏｊｉ，喺網上爆發咗一場討論，事源原本屬於ＱＱ嘅「掩面流淚ｅｍｏｊｉ」商標，畀神州浙江義烏人金召平搶注，ＱＱ當然唔制，提出異議申請喇。　　之後事件喺國內網上愈鬧愈大，有啲網民就話「唔知以後仲可唔可好好傾偈喇」，亦都有網民喺各個微信群組貼出「掩面流淚ｅｍｏｊｉ」，抵死咁問「喂！點解唔係騰訊註冊嘅？」，亦有人為兩個ｅｍｏｊｉ找不同，當然其實係無分別喇。　　其實，今次金召平搶註嘅用途，主要都係考慮用喺服裝產品上，應該就唔會影響到各位網友，喺網上應用嘅，不過又講返，從事服裝貿易嘅佢就話自己已經用咗呢個掩面流淚ｅｍｏｊｉ喺衫褲上都有兩年咁耐，近排突然間覺得要維護返自己嘅使用權益所以就申請註冊，不過當有人追問佢嘅ｅｍｏｊｉ係咪嚟自ＱＱ嘅時候，佢就打趣咁話：「我用嗰陣呢個ｅｍｏｊｉ仲未好ｈｉｔ嫁」！　　ＱＱ就話其實呢個ｅｍｏｊｉ係由一個廣東８０後設計師，參考星爺嘅誇張掩面動作而得嚟，不過盈盈對星爺呢個動作就無咩印象，反而就諗起陶大宇，大家又有無同感呢？哈哈哈！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇