《笑傲缸湖》中美貿易戰愈演愈烈，隨住花旗國１１月中期選舉在即，貿易戰或者有擴大可能。摩通行政總裁戴蒙（Ｊａｍｅｓ　Ｄｉｍｏｎ）日前竟然向花旗國總統侵侵（特朗普）「挑機」，話如果自己參選總統，會擊敗侵侵。不過，戴蒙「轉軚」速度亦相當快，噚日（１６日）火速澄清參選言論，仲大讚侵侵經濟攞「Ａ」。果然係利字當頭，富不與官爭。　　話說，現年６２歲嘅戴蒙，上星期三（１２日）喺一個慈善活動上面話，如果自己參加花旗國總統競選，會擊敗侵侵，因為自己同佢一樣強硬，但就比佢聰明。但戴蒙好快知衰，一粒鐘都唔夠就發聲明，話自己唔係諗住參選，發表咁嘅言論亦證明咗自己唔可以成為優秀嘅政治家。　　平日鍾意玩Ｔｗｉｔｔｅｒ又多口嘅侵侵又點會唔反擊，第二日就發文開火，話戴蒙競選總統嘅問題在於無「天賦」同「才智」，仲係一個糟糕嘅演講者，又自誇喺佢經濟政策之下，好多賓架睇起嚟比實際上更聰明，言論認真惹火。　　戴蒙喺噚日播出嘅訪談節目上，再澄清唔係要參選，同為自己言論深表自責，之後仲大讚侵侵經濟政策相當唔錯，要俾Ｇｒａｄｅ嘅話可以係「Ａ－」或者「Ｂ＋」。　　一場花旗國最大投行高層同花旗國總統之間嘅「對決」，盈盈一早買定幾袋花生等睇戲，不過，其中一方咁快認低威，睇怕呢場口水戰都應該告一段落囉。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇