《笑傲缸湖》「山竹」襲港，學生哥就有二日假，打工仔就無咁幸福喇，盈盈聽好多打工仔講，星期一（１７日）返工就好似玩障礙賽一樣。雖然「打風望放假」呢種心態，其實都幾病態，不過打工仔邊個唔想吓假，攤唞吓呢？如果打工仔每個星期只係返三日工，你話幾好呢！　　米字國最大型汽車製造商，積架越野路華（Ｊａｇｕａｒ　Ｌａｎｄ　Ｒｏｖｅｒ）最新就喺當地伯明翰嘅工廠實施三日工作制，但人工幾多先？答案係Ｆｕｌｌ　Ｐａｙ（全薪）啊！嘩，咁爽皮！不過原來背後係有苦衷嘅。　　話說積架越野路華ＣＥＯ話，車廠受住米字國「脫歐」同柴油汽車銷售下跌影響，為咗保住工廠大約１０００個員工嘅飯碗，所以先搞三天工作制，而且只係喺１０月到１２月實行。　　佢話米字國嘅政策導致消費者對購買柴油車卻步，根據當地汽車生產商與經銷商協會（ＳＭＭＴ）所講，喺２０１７年米字國嘅柴油車銷售已經下跌咗３０巴仙。不過難題又點只得一個呢？除咗近日Ｈｉｔ爆嘅貿易戰之外，由於米字國搞緊「脫歐」，早係７月嘅時候ＣＥＯ就講到，如果「脫歐」之後唔可以同歐盟維持平穩嘅貿易關係，咁就將會令公司每年損失１２億英鎊咁多，加上「脫歐」之後可能會導致原材料供應緊張，又要每日畀多６０００萬英鎊。佢警告如果米字國最終係「硬脫歐」，可能會導致汽車業損失數以萬計嘅工作。　　盈盈聽Ｄ朋友講開，如果有睇開《Ｔｏｐ　Ｇｅａｒ》節目嘅人都知道，主持Ｊｅｒｅｍｙ經常都感嘆米字國砵砵車已經不復當年勇，英國佬唔撐英國車，好多當出名嘅車廠都已經落入其他國家嘅手中，好似呢次主角積架越野路華就係印度塔塔汽車所有，勞斯萊斯就喺德國寶馬手上，Ｌｏｔｕｓ就畀吉利（００１７５）阿媽買咗。　　唉！米字國砵砵車品牌擁有嘅紳士風度、豪華儒雅形象，咁就隨風消逝！？《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情