《笑傲缸湖》舊年香江魚缸強勢彈起３６巴仙或７９１８點，牛氣沖天下缸友幾乎買乜都有錢賺，而買中資科技佬嘅缸友更加係賺到盆滿砵滿，「股王」ＱＱ（００７００）亦急彈超過１倍！上年新聞仲話，有缸友買咗ＱＱ嘅衍生產品順利儲到錢同另一半拉埋天窗添！可惜盈盈上年只可以眼甘甘咁望住個魚缸，同埋歎息一句：「這些機會不是屬於我的」。　　不過，今年魚缸自年頭起開始大插水，ＱＱ當然「不負眾望」上演「Ｙｏｕ　ｊｕｍｐ，Ｉ　ｊｕｍｐ」戲碼，今年以嚟已經唔見咗兩成。ＱＱ話晒都係今年先開始有走低嘅表現，而且仲要有唔少分析師「十卜」佢，最後當然令唔少缸友大跌眼鏡啦！　　據彭博最新統計，獲大行分析員評級「買入」最多嘅全球市值超過１０００億美金嘅公司，ＱＱ今年表現之差「遙遙領先」，截至禮拜二（１８日）挫重２２巴仙，市值蒸發１０８０億美金（即約８５００億港紙），成為全球最令人失望嘅股份。　　除ＱＱ外，十大最令人失望股份中，仲有工行、建行、阿里巴巴、平保、貴州茅台，即係中資股佔咗六隻（見附表）。缸友如果有揸貨，真係喊得一句句。《任盈盈》

　　表列今年全球十大最令人失望股份：

　　公司名稱　　　　　　　年初以市值變幅　　　　　最新市值（美金）　　　－－－－－－－－－－－－－－－－－－－－－－－－－－－－－－－－－　　騰訊控股　　　　　　　　－２２﹒０％　　　　　　３８８０　　百威英博　　　　　　　　－１７﹒０％　　　　　　１８１０　　工商銀行　　　　　　　　－１３﹒０％　　　　　　２６９０　　三星電子　　　　　　　　－１１﹒０％　　　　　　２５８０　　建設銀行　　　　　　　　－　９﹒２％　　　　　　２０９０　　Ｆａｃｅｂｏｏｋ　　　　－　９﹒０％　　　　　　４６４０　　阿里巴巴　　　　　　　　－　７﹒９％　　　　　　４１２０　　Ｃｏｍｃａｓｔ　　　　　－　７﹒７％　　　　　　１６９０　　中國平安　　　　　　　　－　７﹒４％　　　　　　１６９０　　貴州茅台　　　　　　　　－　４﹒４％　　　　　　１１８０　－－－－－－－－－－－－－－－－－－－－－－－－－－－－－－－－－　　註：獲最多大行分析員薦買而逾千億美金市值嘅股份　　資料來源：彭博

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情