《小傳日記》花旗國一如預期，宣布加息四分一厘，而出年維持加息三次嘅預測，態度都唔算強硬，噚晚（１３日）道指繼續開心高收，漲８０點報２４５８５點創新高。而今次係耶倫姨姨任內最後一次記者會，小傳都有Ｄ唔捨得佢添。　　耶倫言論較為鴿派，香江魚缸今朝（１４日）都更加可以放下心頭大石，恆指高開１１３點報２９３３５，可惜股王ＱＱ（００７００）仲未唞完，連獅王大象（００００５）都要碌番落去，完全抵銷晒中港地產佬嘅貢獻，最後恆指都係要跣低５５點報２９１６６；國指今早都叫叻，象徵式踢高１１點收１１５３１。　　不過，成交都無太大變化，好彩都守得住千億銀，約有１０６５億。其實以節日氣氛濃厚嘅１２月嚟講，有呢個成交都算唔錯了！

＊加息早預期新地勁跳起，內房佬都勁碧桂好富貴＊

　　花旗國聯儲局終於正式公布議息結果，加息０﹒２５厘，大家都一早打定個底，所以今日地產佬齊齊造好。新地（０００１６）就最厲害，一下子突破百天線（１２４﹒９７銀）、廿天線（１２５﹒８銀）同５０天線（１２６﹒５３銀），飛起逾３巴仙，報１２７﹒５銀。街坊新世界（０００１７）亦緊隨其後，衝前逾１巴仙，報１１﹒４銀；恆地（０００１２）都跳起１巴仙，報４９﹒８５銀。　　內房佬都係咁勁，藍戰新貴碧桂園（０２００７）飛起逾４巴仙，報１３﹒３２銀，係是日最大升幅藍籌股；潤地（０１１０９）彈高近３巴仙，報２２﹒２銀；中海外（００６８８）跳起逾１巴仙，報２４﹒２５銀。

＊Ｎａｓｐｅｒｓ定心丸ＱＱ唔腳軟，好消息炒完獅王要回吐＊

　　股王ＱＱ自從上個月２１號創咗４３９﹒６銀山頂位之後，就無晒力碌番落去，跌到去３６５﹒２銀先開始有承接，近排都開始恢復元氣，開始喺４００蚊水平進行整固。就喺呢個時候，ＱＱ單一最大股東Ｎａｓｐｅｒｓ接受外電訪問時就派定心丸，話由２００４年到依家，都未沽過ＱＱ一股，依家亦無意減持！另一方面，又傳出ＱＱ準備出年將旗下ＱＱ音樂上市，總之生意愈做愈多元化，對ＱＱ有信心嘅缸友，就算ＱＱ今日未上番４００蚊大關，但都微升收報３９７﹒２銀，都算唔錯哦，繼續揸貨等股王唞夠再發威吧！　　獅王大象近排炒花旗國加息下，接力成為缸友掃貨對象。既然依家花旗國加息四分一厘已塵埃落定，大象無消息炒作，今朝衝到去８０﹒４銀就出現獲利回吐，收市稍為跌番去７９﹒５５銀；街坊中銀香江（０２３８８）都一樣，升到去４０﹒５銀山頂位後就碌低番近２巴仙，收３９﹒５０銀，唞一唞回氣都好正常。

＊醫藥股受捧藥明確硬淨，舉杯齊歡唱潤啤玩破頂＊

　　雖然大市腳軟軟，但醫藥相關股近排好受歡迎喎！雖然藥明生物（０２２６９）控股股東配售近１１巴仙股權，套現大拿拿５１億銀，不過佢相當硬淨，今朝只係低開ＤＤ，其後就跟隨街坊一齊飛高，跳起近３巴仙，報４２﹒７５銀，從今日低位足足反彈咗逾５巴仙。至於呢幾日已經好出位嘅中生製藥（０１１７７），獲花旗列入首選名單，跳起近６巴仙報１２﹒７８銀，高見１２﹒９６銀再破頂！街坊金斯瑞（０１５４８）仲勁，衝前近１３巴仙破頂，報１４﹒１８銀，今個星期已經累升３５巴仙啦！　　逆市跳起嘅仲有潤啤（００２９１），野村維持佢嘅「買入」評級同埋「他屐」２６﹒９銀，今日飛起近４巴仙破頂，報２６﹒２銀；街坊青島啤酒（００１６８）都跳起近８巴仙創新高，報３７﹒９５銀。有貨嘅缸友真係飲得杯落。

＊砵砵車衝前長汽夠氣力，中金叫Ｂｕｙ入南航沖天飛＊

　　中汽協話要調低今年砵砵車產銷量５巴仙嘅預測，減到去增長３﹒５％，仲話今明兩年砵砵車「孖屐」只會錄得輕微增長。不過一眾砵砵車都無受消息影響，照舊逆市跳起。長汽（０２３３３）高見９﹒２４銀，突破廿天線（９﹒０３１銀），最終衝前近３巴仙，報９﹒０４銀；吉利（００１７５）本身走勢都唔錯，曾經高見２６﹒０５銀，不過午後就開始站不住腳，最終只係輕微踢高近１巴仙，報２５﹒７銀。　　南航（０１０５５）噚日（１３日）都已經飛起近３巴仙，估唔到今日仲有力再跳多３巴仙，兼創逾兩年高。原來全因為出咗營業數據後有中金唱好，俾個「買入」評級同９﹒６銀「他屐」，最終報７﹒６銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》如何搞好家庭關係？關係破裂幾時要放手？修補關係切忌讓XX充昏頭腦！► 即睇