《小傳日記》花旗噚晚（１２日）起一連兩晚議息，道指已經率先跳起１１８點收報２４５０４點。香江魚缸都開心升埋一份，今朝（１３日）高開６２點，上半場就由大象（００００５）同濠賭佬領軍，但ＱＱ（００７００），限制咗大市升幅，半日都只係抽高７９點收２８８７３。　　點知原來驚喜在後頭，午後回來祖國錢莊終於發力追落後喇！建行（００９３９）大升逾４巴仙向７字頭邁進，工行（０１３９８）都有逾３巴仙落袋！連靜咗咁耐嘅錢莊都夾高，好友當然乘勢出兵，一度將恆指推高４８２點至２９２７６點。埋單都仲有４２８點進帳收２９２２２，勁！國指當然都好省鏡，跳起２０７點收報１１５１９。　　中港錢莊合力撐市，缸友入市都爽Ｄ，全日成交約有１０６８億銀。　＊美息將揭盅好友率先衝，內銀追落後缸邊炒個瘋＊　　　大象連日嚟帶挈其他本地薑錢莊發威，到咗今日晏晝神州同業都升埋一份，而且仲猛力追落後添；其中建行一馬當先衝前超過４巴仙，一眾內銀中跑第一，報６﹒９３銀。工行獲北水湧入，不知幾巴閉，連升咗四日，加加埋埋都有超過半成，今日就彈起超過３巴仙，報６﹒２銀。近排中行（０３９８８）喺所有大隻錢莊入面表現算係無咁叻，噚日仲要低見３﹒７１銀，創咗差唔多五個月新低，好彩嘅係今日都跟住班街坊反彈，升咗近三巴仙，報３﹒８２銀。至於慶祝１００周年嘅囝囝中銀香港（０２３８８），就破頂式升３％。　　招行（０３９６８）今朝本來仲跌近２巴仙，食完晏晝返嚟就精神返晒，彈高咗近２巴仙，報３１﹒３銀。話時話，今年到而家招行坐底升咗超過八成，係至叻嘅內銀。　＊中英增航班鐵鳥飛得高，濠賭齊踢上銀娛超風騷＊　　　濠賭佬今日相當出位，全線齊齊踢高，銀娛（０００２７）喺當中就最突出，飛起近６巴仙，報６１銀，以全日最高位收市，創埋２０１４年８月以嚟新高添，係是日最勁揪藍戰士！街坊金沙（０１９２８）都唔弱，衝前５巴仙，報４１﹒３５銀，緊隨喺銀娛後方。而美高梅（０２２８２）有瑞信升評級同目標價，當然非常開心，踢高逾５巴仙，報２４﹒３５銀。　　今日另一個巴閉板塊係鐵鳥，皆因中英協議航班數增加五成，加上隔晚油價大幅回落，帶動國航（００７５３）最多飛起過近１３巴仙，最終衝高８巴仙，報８﹒７２銀；街坊東航（００６７０）同南航（０１０５５）都分別踢高約３巴仙，而屐飛（００２９３）都跳起咗逾２巴仙。　＊息差勢擴闊聖誕博匯豐，ＱＱ與街坊粉絲似失蹤＊　　　花旗國司法部終於都同大象傾掂數，唔再查大象有冇涉及幫墨西哥大毒梟洗黑錢；加上「孖屐」預料耶倫姨姨會喺聽朝公布議息結果，加硬四分一厘，即係話有利呢Ｄ國際大錢莊擴大息差，大象全日升咗２巴仙，仲要一度升抵８０關，報７９﹒９５銀。　　做開升市火車頭嘅ＱＱ（００７００）喺上個月破咗頂之後就開始有少少運滯。之不過，雖說呢排都畀Ｄ錢莊佬攞晒彩，但係今年以嚟計都仲有成倍升幅落袋，相當把炮。ＱＱ今日升唔夠一個巴仙，報３９５﹒６銀。　　其他科技佬就冇乜運行，手機鏡頭一哥舜宇（０２３８２）１１月中喺山頂位１５２﹒６銀插旗之後就腳軟碌落山，而且碌到而家都仲未識得停，繼噚日因為上個月嘅鏡頭出貨量數據唔多省鏡搞到股價插咗超過７巴仙後，今日仲要跣低近三巴仙，報１０７﹒４銀，盤中仲要低見１０１﹒２銀，差少少就失守埋紅底。若然由山頂位計，大嗱嗱蒸發咗近三成！　　舜宇街坊瑞聲（０２０１８）都係同一命運，同樣喺上個月高見１８５蚊破頂後碌返落嚟，今日就跌咗超過一巴仙，報１４５﹒９銀，由山頂位計，已經調整咗超過２１巴仙！　＊高佬畀個讚敏實返來喇！穆迪踩一踩保保多撻瘌＊　　　敏實（００４２５）雖然噚日跌低咗近５巴仙，不過因為有高盛唱好，差唔多大升目標七成，今日就跳返起近６巴仙，收復哂前一日嘅失地，收報４７﹒１銀。　　高盛最新仲出咗報告講下對內險嘅睇法，不過因為穆迪話對出年壽險業務嘅展望負面，令內險佬升幅受限，表現都個別發展。高盛升平保（０２３１８）嘅「他屐」去到１０７銀，維持「買入」評級，輕微踢高１巴仙，報７９﹒５銀。國壽（０２６２８）就被予「中性」評級，「他屐」３２﹒１銀，今日輕輕踏前０﹒２巴仙，報２４﹒７５銀；新保（０１３３６）雖然獲「買入」評級，不過就腳軟逾１巴仙，報５１﹒６銀。請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新etnet健康網購，送你【健骨維他命D3(1000IU)】乙樽(價值$108)► 立即行動！