《小傳日記》十九大進行中，除咗強調要搞好環保之外，好似冇咩特別板塊好炒。Ａ場前排突破咗三千四後就腳軟，呢幾日走勢更加唔上唔落。　　噚日１０月１９日，適逢８７股災三十周年，魚缸午後被淡友突襲，急插咗最多六百幾點，揸牛證嘅缸友受突襲劏到一頸血，而全日埋單仍大跌５５２點。正當大家都搵緊大跌市理由，個心仲未驚完，好彩今日好友大戶已經返嚟喇！今朝大市先高開２００點，就連ＡＩＡ（０１２９９）季績未達到「孖屐」嘅目標，亦無損一眾好友要翻身嘅決心。恆指最多升過３６０點，高見２８５１９，最後全日埋單仍升３２８點，報２８４８７，可惜守唔住條１０天線（２８４８９）。　　Ａ場繼續牛皮，埋單升８點，報３３７８點。國貨佬亦相當強勁，升２００點或近２巴仙，收報１１５５８點。全日主板成交有９６７億銀，較噚日縮水１７巴仙。　＊昨天是地獄今日變天堂，大市成交縮車仔表現壯＊　　　神州四個轆噚日成為淡友重點掟貨區，吉利（００１７５）噚日就被北水拋棄，淨賣出金額超過１億銀，跌咗超過７巴仙，喺一眾藍戰士入面墊底；但今日就有唔少缸友喺低位撈貨，升勢仲愈嚟愈勁，最終成為咗全日最勁藍戰士，升返近６巴仙，報２６﹒３銀。　　部分車佬喺９月都開足ＴＵＲＢＯ，電動車一哥比亞迪（０１２１１）一馬當先升咗超過五成半，喺今個月頭高見８３﹒７銀兼創咗近八年新高後就見腳軟，噚日仲跣低近６巴仙。隻股今日就彈返近３巴仙，報７５﹒８銀。　　聯通（００７６２）噚日收市後發盈喜，預料頭三季多賺１﹒５５倍，之後仲話會同阿里巴巴及ＱＱ（００７００）會有深度合作，但缸友唔多領情，升咗超過３巴仙後就掟貨走人，搞到全日只係升近１巴仙，報１１﹒２２銀。　　ＡＩＡ雖然喺第三季新業務價值有８﹒２４億美金落袋，按年仲升２０個巴仙添；佢嘅表現始終都係較預期嘅升２１巴仙略遜色，縱然有瑞信重申「跑贏大市」評級，「他屐」仲維持喺７１蚊，但缸友都係冇面畀，全日都要趴低逾１個巴仙，報６０﹒２銀，喺所有藍戰士中跑包尾。　＊聯通發盈喜個價微微起，中興急插後反彈仍欠力＊　　　雖然今年係「唉瘋」誕生十周年，但似乎蘋果今年唔多順遂，推出咗冇幾耐嘅「唉瘋８」唔太受歡迎，噚晚「孖屐」仲有人爆料話蘋果諗住唔生產咁多「唉瘋８」，月產量縮水五成；而唯一嘅好消息係話全力生產「唉瘋Ｘ」，是以魚缸入面嘅手機設備佬今日先至仲頂得住。鴻騰精密（０６０８８）升咗超過４巴仙，報５﹒１４銀；瑞聲（０２０１８）過去兩日跣低近７巴仙後，今日升近３巴仙，報１４０﹒１銀；高偉（０１４１５）就只係升咗近２巴仙，報３﹒６１銀；舜宇（０２３８２）全日成交有近１５億銀，升近２巴仙，報１１４﹒７銀。　　神州通訊設備一哥中興（００７６３）噚日話首三季會多賺超過３６巴仙，但股價都係跌咗超過１１巴仙，好彩今日跟住嗰大市反彈，彈咗近３巴仙，報２６﹒８５銀。神州光纖一哥長飛光纖（０６８６９）就彈高咗８巴仙，報２９蚊。　＊融創四條三你追我又趕，海螺呈強勢缸邊續領放＊　　　雖然中海外（００６８８）係神州磚頭一哥，但首三季成績表認真一般，經營溢利只係升咗近１４個巴仙，對比其他街坊，呢個升幅只係小兒科。不過，呢位一哥話會竭力完成全年銷售２３１０億銀嘅上調「他屐」咁話喎；可惜缸友聽到都好似冇咩反應，全日只係彈高逾１個巴仙，報２５﹒６５銀。　　習大大前排喺十九大重申「屋係用嚟住，唔係用嚟炒」，即係變相話唔想見到磚頭價格好似火箭咁愈升愈有，但都無阻磚頭佬嘅升勢，今日仲圍埋一齊開Ｐａｒｔｙ添。有北水炒開嘅融創（０１９１８）全日飛起約５巴仙，報３９﹒４５銀，而四條三恆大（０３３３３）一騎絕塵跑贏所有街坊，全日踢高逾８巴仙，埋單報３１﹒５５銀。　＊中材中建材雙雙漲一成，阿爺來關顧環保特別醒＊　　　噚日個市急插，但神州水泥一哥海螺（００９１４）就一於少理，照樣逆市升１個巴仙。到咗今日，佢嘅表現仍然省鏡，加上「孖屐」憧憬到冬天會有唔少水泥佬停產，作為龍頭嘅海螺自然會好著數，結果佢全日跟住大市踢高咗近６巴仙，報３４﹒４銀。早排話要搞合併嘅中材（０１８９３）同中建材（０３３２３）最把炮，雙雙升咗１１巴仙，分別報５﹒５銀同埋６﹒６８銀，勁！　　無論係十九大前同十九大舉行期間，光伏同風電佬明顯跑贏大市，事關習大大提到要搞好環保，加上缸友憧憬之後會有環保政策出台。陽光能源（００７５７）就最省鏡，今個禮拜就爆上近３８巴仙，今日就升咗超過１２巴仙，報０﹒３６５銀；風電佬入面，金風（０２２０８）同新天綠色（００９５６）都升近６巴仙，報１０﹒９８銀同２﹒３３銀。假期愉快，請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新etnet健康網購，送你【健骨維他命D3(1000IU)】乙樽(價值$108)► 立即行動！