《小傳日記》花旗國魚缸禮拜一（２０日）喺科技佬嘅大插下全線急瀉，雖然噚日Ｆａｃｅｂｏｏｋ繼續潛水，但油價彈起超過兩巴仙，帶動道指反彈１１６點，報２４７２７。　　香江呢個禮拜有幾隻重磅藍戰士派成績表，平保（０２３１８）就喺噚日魚缸收工後放榜，舊年賺多咗４３巴仙，遠勝「孖屐」預期，而且全年派息仲多咗一倍，今朝競價時段已經爆上近４巴仙，加上ＱＱ（００７００）喺今日（２１日）收市後放榜，喺兩個大隻佬嘅支撐下，魚缸早段一度最多飆高４２８點，高見３１９７８，衝破埋上個月嘅低位反彈浪浪頂，約３１８００點。　　中午之後，祖國有報道話平保今年冇計劃分拆陸金所香江上市，嚇到唔少缸友趁平保仲喺高位嘅時候食胡散水，大市氣氛即時一片風聲鶴唳，ＱＱ亦都插水，搞到魚缸一度倒插１６８點，低見３１３８１，魚缸最終跌１３５點，報３１４１４，差Ｄ守唔住條５０天線（３１４０４），全日高低波幅有成５９６點，缸友心情有如坐過山車一樣！　　國指唔見咗７５點報１２５２１。ＱＱ放榜前夕，北水持續湧入魚缸，單隻ＱＱ全日成交就高達近１３３億銀，平保成交都超過１２３億，成個魚缸成交就有１５２９億銀，比噚日多咗２４巴仙。

＊藍戰發業績初段幾出色，高開後散水好友心都碎＊

　　近日萬眾矚目嘅藍戰士平保、吉利（００１７５）同ＱＱ，波動幅度真係大到嚇死人，少Ｄ信心嘅缸友相信好易被震走。平保宣布上年度淨利８９０億人仔，按年增４３巴仙，好過孖屐預期。匯證、高盛等都睇好，分別睇１０６銀及１１３銀，不過股價一開波高開近４巴仙，之後早段再高見９４﹒８銀創近兩個月高，下午就因為傳出陸金所今年無上市計劃，腳軟逾３巴仙，報８８﹒３銀，不過公司之後就澄清話管理層未有回應過陸金所上市計劃，只係話亦下科技子公司只係根據市況而定上市計劃。街坊新華保險（０１３３６）就受重傷，舊年多賺近９巴仙唔夠省鏡，瑞信德銀都出手削目標，前者仲話只值５０﹒５銀，搞到新保急瀉一成收３９﹒８５銀，慘。　　吉利命運亦一樣，全年多賺逾倍勝預期，但缸友都係趁好消息出貨，股價之後倒跌，仲愈踩愈深，埋單計唔見逾６巴仙，報２５﹒８銀，現穿頭破腳。　　至於大家一直期待嘅ＱＱ，初段由於缸友憧憬公司業績，股價上到４７５﹒６銀，差Ｄ挑戰到４７６﹒６銀歷史新高，不過之後竟然大幅倒跌，跪低十幾蚊，倒跌最多逾１巴仙，好彩之後好友出返場支持，最終腳軟唔夠１巴仙，報４６２﹒６銀。等咗咁耐，ＱＱ收市後終於揭盅，第四季多賺９８巴仙至２０８億人仔勝預期，全年盈利亦升７４巴仙至７１５億人仔，派末期息８８港仙，勁呀。股王果然無令粉絲失望！

＊進軍菲律賓銀娛好開心，破頂後乏力沽壓確難敵＊

　　賭股阿哥銀娛（０００２７）旗下公司獲菲律賓娛樂同博彩公司發出臨時博彩牌照，消息刺激銀娛飛起近３巴仙，一度去到７２﹒５銀插旗，創近四年高，只係埋單微跌，報７０﹒８銀。公司早前估計，臨時牌照發出後，長灘島綜合度假村項目動工，投資額達３９億銀，都唔細架！　　油價升返，「三桶油」祖國石油（００８５７）、祖國石化（００３８６）、中海油（００８８３）有約２巴仙進帳，而昆能（００１３５）績後就獲大摩唱好，只係午後突然倒跌近４巴仙，報７﹒０８銀。睇嚟去年多賺逾６倍都幫唔到手喎！而另一方面，舜宇（０２３８２）今日再破頂，高見１７１﹒６銀，高過野村「他屐」１６０銀，不過之後就無升跌，收市報１５９﹒８銀。　　ＡＩＡ（０１２９９）亦喺創６９﹒８５銀上市新高後腳軟，全日無咗逾１巴仙，報６７﹒９５銀。　　

＊神州磚頭佬放榜齊走高，潤地獲唱好落鑊好風騷＊

　　神州磚頭佬今日表現勇猛，省鏡業績仲要加埋大灣區概念支持，潤地（０１１０９）今日幾乎全日把守住藍籌升幅榜首位，噚日公布嘅核心盈利稍勝預期，今日即有多問大行護航炒高，野村更畀「最牛他屐」３９﹒９５銀叫大家「掃貨」，潤地一度彈上３１﹒４銀，升破所有主要平均線。潤地最終以３０﹒０５銀埋單，全日彈起５巴仙，勁！街坊碧桂園（０２００７）亦唔輸蝕，早前宣布上年賺多１﹒２６倍，獲高盛睇好買入，升「他屐」到２５﹒５銀，碧桂園全日抽高超過１巴仙，收報１６﹒４６銀，碧桂園今個月已經累漲成１７巴仙，認真威水。　　雅居樂（０３３８３）亦圍埋開Ｐａｒｔｙ，宣布上年多賺逾１﹒６倍，預售金額按年增５２巴仙，今日股價即飛到上１６﹒４４銀，即使尾市升幅收窄，埋單都依然升近５巴仙，報１５﹒９４銀。朋友仔中海外（００６８８）今日亦升逾４巴仙，以２９銀埋單。　　花樣年（０１７７７）主席潘軍好威咁話今年合同銷售目標係３００億人仔，目標希望２０２０年更加要突破千億，見佢咁有信心，缸友似乎表示支持，花樣年今日埋單報１﹒５４銀，全日漲６巴仙。

＊中金都睇低敏實好失威，大劉願接貨利福系落鑊＊

　　藍戰士放榜初段成功吸引缸友目光，但部分個股啱啱公布嘅成績單就唔係個個缸友都滿意，敏實（００４２５）上年賺多１８巴仙，派息８５仙，不過就畀摩通降低「他屐」到４０銀，維持中性評級，敏實今日裂口低開，最低見３７﹒６銀，收市蒸發１２巴仙，報３９銀。　　永達汽車（０３６６９）去年雖然賺多７７巴仙，末期息派０﹒３３６銀，但亦被中金調低「他屐」到１５﹒９銀，維持買入評級，永達汽車今日插超過１１巴仙，以８﹒５８銀埋單。　　金風科技（０２２０８）後日（２３日）放榜，今日即成功炒上超過七年高位，一度彈上１５﹒８２銀，雖然之後升幅收窄，但埋單仍漲６巴仙，報１５﹒２銀。　　利福系畀卡塔爾投資局掟貨，利福國際（０１２１２）今日復賽，話大股東大劉（劉鑾鴻）會接貨，持股量增持至近七成，復牌急衝高，雖然曾經低見１２﹒４銀，但埋單前更彈番彈１３﹒０６銀，最終埋單都升４巴仙，報１３銀。利福中國（０２１３６）都獲大劉接貨，埋單抽高近１５巴仙報２﹒４４銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇