06/01/2021

香港本土時尚:天九文化與潮流碰撞!服飾品牌Tin Kau Club異軍突起

  • 加入最愛專欄
  • 收藏文章
  • 汝勤

    汝勤

    本地設計師(MADE IN EDEN)、手作人(EDEN CRAFTS WORKSHOP)及紳士文化平台(WALKING DAPPER)的左腦,主張在細節中透現文化內容,從音樂、電影、歷史、人文...多角度品嚐每個時尚風貌,在現代與傳統的互相激盪之下,道出你我他身上每件服裝的背後故事。

    逢周二更新

    The Dapper Style

  單天保至尊!——細細個已經聽班叔父掛響嘴邊嘅天九術語,霸氣又親切,估唔到剛響旺角一個展覽入面再聽到。呢個《天九至尊神學研究中心開放日》散發住港式騎呢幽默情懷,精妙之處在於無比認真嘅內容製作,由繪圖定律 、一丿、寧死不屈、松島安呢四個單乘聯乘交織出一個通俗展,非常吸引,仲可以即場學埋打天九。同時間亦發佈了一系列服裝飾品(Instagram @tin9club),潮味背後係幾百年次文化紮根,成個collection衝擊到我要用廣東話嚟寫呢篇文。啲人成日話香港後生仔崇洋媚外,其實我地不知幾愛本土文化。

 

 

  一打開門,街頭詩人松島安x寧死不屈既setup已經先聲奪人,呢種陀地架步非凡體驗真喺雅俗共賞。旁邊係繪徒定律(The Paintful’s Law)嘅一系列T-shirt作品,圖案設計全部有典故出處,精讀貼士幫助初學者記牌,功能與美學兼備,簡直係文化保育,其實遊戲既存在往往係文化體現,例如國民黨打天九、共產黨鬥地主,西方就玩大富翁。今次繪徒定律仲出埋天九牌譜教學指南,由創作、設計、裁紙、印刷、蓋印到釘裝縫製……均由團隊一手包辦,100% MADE IN HK!

 

 

  展覽中最震撼係橫成幅牆咁大嘅天九下海圖,鬼馬狂想得嚟亦好切合文牌(天九分文、武兩組牌)嘅像形圖案概念,歌仔都有得唱 「~拎冧六,長衫六,高腳七,一隻大頭六~」。其實呢個賭博遊戲蘊藏好多易經智慧,所有構思都有哲理來歷,例如天地人和、二十四氣節、十六項道德(仁、義、忠、信、禮、智、廉、恥、惻、隱、羞、惡、辭、讓、是、非)等等。仲不得不提,呢張唔係巨型海報—而係針織!由本地老字號織嘜廠製造既無價之寶,織線100%來自回收膠樽,行內所謂"New Life TM"環保技術,即係型得嚟都要可持續發展。

 

 

  天九系列入面仲包含華服設計,出自品牌一丿既手筆,貫徹佢地充滿東方色彩、香港傳統元素既作風,時裝界朋友呢幾年應該都有見過佢地響Joyce、Lane Crawford嘅曝光。今次響呢個氣勢磅礡嘅堂口前面陳列住佢地大膽玩味嘅設計,胸前繡章散發街頭味道,而袖口嘅拉鍊袋更仿似MA1軍褸手臂部分嘅設計,用嚟放天九真係美軍都俾你拋窒。

 

 

  其實我地平時好多口語,例如食夾棍、磨爛蓆、一棟都無…等等亦來自天九術語,廣東話影響力實在不容小覷。今次展覽仲有黑豹宣傳機器、Minihonor、 The Polska Traveller、Sticker Kings 、Supreme Accessories & Packaging等多個單位參與創作,大家記得留意官方IG同嚟緊嘅網店!

 

 

  單天保至尊?其實講緊天九入面有「大雞」、「細雞」兩隻孤苦無依、點數好細嘅牌,通常用嚟墊屍底,但當兩隻配搭起黎又偏偏會成為最大既對牌「至尊寶」,足以扭轉全盤戰局!正如周星馳《西遊記》飾演既至尊寶,只要遇到人比佢三粒痣(取自天九牌最細嘅「細雞」),就可搖身一變成齊天大聖…… 呢種小人物大英雄既幻想係最引人入勝,今時今日香港地有邊個唔想力挽狂瀾、逆轉命運?等緊既就係適當時機同埋團結志同道合嘅人。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【數量有限】訂閱etnet YouTube Channel,即可獲贈etnet精美筆記本及年曆卡! ► 立即行動

我要回應

You May Also Like

The Holiday Romance

  • 生活副刊
  • DIVA
  • 健康好人生