《小傳日記》港股今朝早（２６日）只係輕輕高開５７點，之後都係窄幅上落。點知下半場
，股王ＱＱ（００７００）發威曾高見２８５銀破頂，中字輩又開香檳慶祝Ａ場高收，恆指埋單
急漲２０１點或０﹒８巴仙落袋，收報２５８７１終止四連跌，仲收復十天及廿天線。
摩指納Ａ將來可能納入１９５隻中盤股，太好啦！Ａ場收市前發威，彈高近１巴仙收
３１８５點，以近全日高位收市，國貨佬開心跳起１００點報１０５３０，ＥＴＦ如２８２２，
２８２３亦即時破頂；不過，全日魚缸成交就未見配合，只得６８２億銀。
其實仲有四日就踏入７月，如無意外，相信「五不窮、六不絕」機會好大。魚缸經過成個月
整固之後，加上七一回歸２０周年臨近，國家主席習近平亦將會喺今個星期四至六訪港；魚缸好
友滿憧憬，睇嚟隨時開香檳都唔出奇喎！
＊Ａ仔入摩指擴至中盤股？Ａ場高高收ＥＴＦ破頂＊
錢莊中銀香江（０２３８８）好「得」！事關佢獲大摩唱好，將目標價由３８蚊升到４６蚊
，重申增持評級，缸友聽到立即掃貨，結果今日抽高６巴仙，收報３６﹒８５銀係最威水藍戰士
，仲試過高見３６﹒９５銀創新高，勁！
煤佬神華（０１０８８）都好生猛，一度飛起近半成；但後來傳阿爺想將動力煤價格嘜喺
５７０人仔每噸封頂，結果收市升幅收窄到２巴仙，報２０﹒１銀。
賭仔亦發威，瑞銀升咗馬交今年賭收預測，仲升埋成班賭仔目標價，銀娛（０００２７）彈
起２巴仙，報４８﹒１銀；金界（０３９１８）仲犀利，獲花旗唱好，有近１８巴仙進帳，收報
４﹒０２銀。
＊摩笛吹呀吹中銀多人追，瑞銀來唱好賭仔認真帥＊
富瑞升舜宇光學（０２３８２）目標價，一口氣由５５銀躍升至８６銀，評級由「持有」升
到「掃貨」，舜宇即刻破頂急升，高見７３﹒２銀，全日升２﹒６１巴仙，報７２﹒６銀。街坊
中興通訊（００７６３）（深：００００６３）同樣獲富瑞睇好，維持「掃貨」評級，大升目標
價四成至２５﹒９５銀不變，消息帶動中興全日升４﹒３４巴仙，高見１９﹒２２銀創近兩年新
高，以近全日最高位１９﹒２０銀埋單。
中聯重科（０１１５７）將會喺星期四（２９日）除淨，近排表現相當強勢，連續三日累升
９﹒０３巴仙，高見３﹒８９銀創兩個月新高，全日升６﹒３３巴仙，埋單報３﹒８６銀，勁！
＊舜宇與中興大行齊祝福，中聯內房佬表現亦不俗＊
神州磚頭佬齊齊開Ｐａｒｔｙ，碧桂園（０２００７）近排獲高盛睇好兼升「他屐」到
８﹒５銀，應聲彈高逾３巴仙，報９﹒０２銀。龍湖地產（００９６０）就有野村繼續叫「買貨
」，目標上調至２０銀，跳高近８巴仙，報１６﹒５６銀。融創（０１９１８）、萬科
（０２２０２）唔輸蝕，飛起６同２巴仙，埋單報１５同２２﹒３５銀。
Ａ場今日發威，連帶一眾ＥＴＦ都發力向前衝，南方Ａ５０（０２８２２）、Ｘ安碩Ａ５０
中國（０２８２３）孖住行前１巴仙，報１２﹒９６同１２﹒４２銀。華夏滬深三百
（０３１８８）亦斬穫逾１巴仙，收４２﹒９５銀。
＊中金捧國航同行也添翼，協鑫見異動飛起好夠力＊
油價近日雖然連日反彈，布蘭特８月期油上星期收高近１巴仙，報４５﹒５４美金，紐約８
月期油收高近１巴仙，報４３﹒０１美元。不過油價彈返少少，無影響飛機佬升勢。中金最新上
調國航（００７５３）目標價，由８﹒３銀升到９﹒５銀，維持「掃貨」評級，國航股價飛近６
巴仙，報８﹒０３銀。街坊東航（００６７０）同南航（０１０５５）就被中金升目標價至
５﹒８銀同７﹒８銀，雙方都得到「掃貨」評級，兩者分別飛起近４巴仙同逾４巴仙，報４﹒７
銀、６﹒７８銀。
保利協鑫（０３８００）上日升逾４巴仙之後，今日大成交再飛起近８巴仙，報０﹒８２銀
，升破廿天線，睇嚟股價開始見底，缸友入咗貨未？請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
