《小傳日記》魚缸熱到爆，千六億成交；ＱＱ與平保，高追好唔好？

　　《小傳日記》股王ＱＱ（００７００）噚日（２０日）威盡魚缸，以４２０銀歷史高位收市
，今日（２１日）再接再厲，開市無耐就直衝去到４３９﹒６銀高位插旗，續第三日再創新高，
尾市縮番Ｄ落去都好合理，埋單收升逾２巴仙報４３０銀，成交則超過２１７億銀，佔大市近
１４巴仙，勁！
　　仲有成班內險佬都發力，香江魚缸高開１０９點後就愈嚟愈勇，半日成交已經超過８４０億
銀；下半場更加上咗火箭一樣，喺收市競價時段又再升多咗，最後埋單飆升５５７點或１﹒９巴
仙收２９８１８，以全日最高位收市，兼再創近十年高，直逼３００００，勁！國指更有３３６
點或２﹒９巴仙進帳，收報１１８７４。
　　魚缸牛氣沖天，全日總成交高達１５７０億，係自２０１５年７月１０日以來最多，生發發
（００３８８）生意多到唔停手，難怪吐氣揚眉衝前近６巴仙收２４４﹒８銀。
　　成班藍戰士威風凜凜，唔少缸友都大呻上唔切車。另一邊廂，大象（００００５）獨憔悴，
宣布２０億美金回購計劃完成，無新動力刺激，全日都頭耷耷，好彩收市前有番ＤＤ力，象徵式
踢高不足１巴仙報７５﹒６銀。
　
＊直逼３萬關再創十年高，大行齊護航平保升唔停＊
　
　　近來強勢嘅神州保險佬，簡直強者愈強。大阿哥平保（０２３１８）認為自己股價仲未反映
到晒真正價值，又話會投入５００幾億人仔去金融科技方面，可謂前途一片光明。公司仲打算分
拆科技同互聯網業務上市，細摩繼續睇平保他屐為１００銀，大和亦升公司他屐。此外，瑞信、
摩通、麥格理都睇好平保，一眾大行護航之下，平保順利飛上近９巴仙，報８６﹒２銀，盤中高
見８６﹒３５銀創新高，成為最勁藍戰士！
　　至於街坊亦唔輸蝕，擬認購協鑫新能源（００４５１）新股同換股債嘅大平集團，旗下上市
公司太平（００９６６）跳起１１巴仙，報３２﹒２銀，公司被中金升目標價到４０銀。而國壽
（０２６２８）、太保（０２６０１）亦有３巴仙及近８巴仙進帳，分別收報２７﹒３５銀及
４１﹒４銀，可喜可賀！
　
＊Ａ仔場省鏡Ａ５０超正，魚缸急急彈生發發開顏＊
　
　　Ａ場頹咗幾日終於再上返三千四，除咗啲神州保險同錢莊佬愈升愈有之外，券商佬一定最受
惠，行業一哥中信証券（０６０３０）（滬：６０００３０）Ｈ股一馬當先爆升咗近７巴仙，報
１７﹒５８銀，Ａ仔仲巴閉，彈起超過８巴仙。華泰（０６８８６）（滬：６０１６８８）就跑
第二檔，Ｈ股彈高近６巴仙，報１６﹒６８銀，Ａ仔亦升近６巴仙。Ａ場省鏡，跟神州魚缸搵食
嘅ＥＴＦ當然冇走雞，南方Ａ５０（０２８２２）升咗超過兩巴仙，報１６﹒２２銀，仲喺超過
兩年高位１６﹒３銀插旗。安碩Ａ５０（０２８２３）都彈起超過兩巴仙，報１５﹒７４銀，一
樣喺超過兩年高位１５﹒８銀插旗。
　　魚缸成交創咗超過兩年新高，最受惠嘅一定係本地薑券商，耀才（０１４２８）跳起超過６
巴仙，報２﹒６３銀；搞獨市生意嘅生發發升咗近６巴仙，報２４４﹒８銀，仲喺超過兩年高位
２４５蚊插旗。
　
＊四個轆好賣吉利開Ｔｕｒｂｏ，坐艇夢破醒易鑫好傷心＊
　
　　神州四個轆龍頭吉利（００１７５）每個月嘅賣車成績都好巴閉，股價都跟住開足
Ｔｕｒｂｏ，今日野村仲睇好吉利話佢旗下新車「領克」訂單強勁之餘，仲可以同其他過江龍
ＳＵＶ車型平起平坐。好消息點止一單，吉利阿媽吉利控股前幾年同瑞典佬買返嚟嘅汽車品牌
ＶＯＬＶＯ會向ＵＢＥＲ賣２﹒４萬架自駕汽車，有傳單刁都成十億美金。不過，吉利今日升得
唔算勁，只彈高咗近４巴仙，報２８﹒９５銀，但最新山頂位已經去到２９﹒２銀，３０蚊關指
日可待。
　　自從電動車龍頭比亞迪（０１２１１）喺上個禮拜六話要喺２０２５年收入要突破萬億人仔
後，缸友似乎都對佢信心爆棚，噚日爆升８巴仙後，今日都彈高咗近３巴仙，報７６﹒１５銀。
　　一場遊戲一場夢，半新丁爆升熱潮瞬間冷卻，缸友一夜身家漲幾倍嘅夢隨即破滅兼坐埋艇，
易鑫（０２８５８）從上個禮拜四（１６號）入缸到而家冇一日係升架，噚日曾跌穿招股價
７﹒７銀，今日仲守唔住７蚊關，低見６﹒９８銀，埋單跣低近８巴仙，報７﹒１２銀，慘。
　　雷蛇（０１３３７）都冇乜運行，從上個禮拜一（１３日）入缸到而家，只係升得一日咁大
把，今日埋單報４﹒１銀，跌唔夠１巴仙，但都高招股價３﹒８８銀近６巴仙。
　　最硬淨嘅就只有閱文（００７７２）一個，但好多缸友都係有得睇冇得食，真正由招股價
５５蚊就開始揸貨嘅街坊唔多，以今日埋單收市價９２﹒９５銀計，每手仲賺７５９０蚊，但今
日個價就跌咗超過３巴仙，而且仲距離山頂位１１０蚊愈嚟愈遠。
　
＊設備佬受捧中興最勁抽，績差被唾棄旺旺欠運氣＊
　
　　魚缸又喺近十年高位插旗，但中移動（００９４１）呢一類神州電訊佬偏偏就冇缸友吼，今
日仲一度跌穿埋７８蚊，冇眼睇。不過，通訊設備佬反而相當有衝勁，皆因有唔少好消息出嚟，
包括菲律賓對神州開放電信「孖屐」，以及工信部大佬去行業一哥中興通訊（００７６３）嘅總
部視察，繼噚日爆升咗６巴仙後，今日仲勁，彈起咗近９巴仙，報３２﹒３銀，最新山頂位已經
去到３２﹒６銀。光纖大佬長飛光纖（０６８６９）都唔執輸，最新山頂位都去到４１﹒５銀，
全日升咗超過６巴仙，報４１﹒３銀。
　　近年乜都撈嘅大隻民企復星（００６５６）呢排都唔少搞作，噚日先話要去歐洲大搞銀聯卡
業務，又話要向喺Ａ場上市嗰仔豫園（滬：６００６５５）注入磚頭資產，大嗱嗱成２４２億人
仔，咁多搞作今日表現都算省鏡，升近７巴仙，報１８﹒２銀。
　　無論係業績定股價都相當頹嘅旺旺（００１５１）頭三季賺少近１４巴仙，雖然都算係意料
之內，但終究都要被缸友唾棄，全日跣底近６巴仙，一度守唔住６蚊關，報６﹒０１銀，跑輸一
眾藍戰士。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。