《古臣周記－古臣》中美博弈，港交所（００３８８）利多於弊？

　　《古臣周記》自新冠肺炎大流行之後，神州同花旗國之間嘅關係彷彿又返到去返貿易戰時期
，雙方嘅「口水戰」不斷，而且花旗國仲開始將戰場轉去金融領域嘅趨勢，最近加緊對中概股嘅
上市規定。加埋恆指公司允許Ｗ股及第二上市股納入指數，上周二（１９日）港交所
（００３８８）股價隨即裂口高開。可惜好景不常，中央擬推港版國安法，香江魚缸上周五
（２２日）急瀉，港交所亦都回吐升幅。雖講花旗國有意針對中概股，有機會令中概股回流，但
「孖屐」又憂推國安法導致外資流走，喺咁嘅環境下港交所前景究竟係利多定弊多？

＊花旗國擬向中概股出手＊

　　喺上個星期三（２０日）花旗國參議院通過《外國公司控股責任法案》，要求外國企業須證
明不受外國政府控制，以及容許花旗國監管機審計其財務報告，否則就有機會被退市。其實，早
喺中美貿戰期間就已經有花旗國官員提出要中概股退市，不過因為瑞幸咖啡帳目造假事件，令到
該建議被重新擺上抬。至於法案最後會唔會實行，就要睇總統侵侵會唔會簽了。
　　其實，經過近年來嘅中美貿易戰，今年爆發嘅疫情，再加埋瑞幸咖啡事件，中概股喺花旗國
可以話愈發寸步難行。消息人士稱，百度正在研討多項應變計劃，包括在香江二次上市，不過表
示暫不會退市。目前，傳京東、網易已經準備喺香江二次上市，計劃於６月掛牌。據數據顯示，
喺花旗國成交量排名前五嘅美國預託證券（ＡＤＲ）有已經在港上市嘅阿里巴巴（０９９８８）
、即將來港嘅京東、網易及考慮來港的拼多多、百度。為此大摩喺報告就話，目前大多數ＡＤＲ
都符合香江上市要求，如果全部喺花旗國上市嘅ＡＤＲ都回流，可以令港交所嘅收入翻倍，日均
成交量可以增４００億銀，仲可以收掛牌費同衍生工具相關費用。日均成交量增加４００億銀唔
係一個小數目，講起目前日均成交都係１０００億銀。

＊港版國安法將通過＊

　　上個星期五中央就宣布將喺香江推行《港區維護國家安全法》，並將於今個星期四（２８日
）交畀人大審議通過，不過外界普遍認為通過嘅可能性極高。因此，消息當日香江魚缸大跌，單
日狂瀉逾千三點，成交更是達１８００億銀！最慘莫過於港交所，有消息帶動好唔容易連升五日
，結果當日就差唔多畀一次清袋。
　　阿臣喺度就唔打算扯上政治問題，主要用經濟方面去研究點解「孖屐」咁驚港版國安法。其
實都同花旗國總統侵侵有關，對於港版國安法侵侵就「出口術」話，如果神州真要施行，花旗國
就會有強烈回應。當中「孖屐」就好驚佢會取消香江獨立關稅區嘅地位。何謂獨立關稅區，就係
喺經濟上面被當作一個「獨立個體」，以保障經濟自由，依個亦係香江咁多年可以成為世界金融
中心嘅主要原因。如果花旗國要取消對港嘅特別待遇，就會威脅到花旗國同香江每年約６７０億
美金嘅商品和服務貿易額，從而令到外企外資流走。據港交所２０１８年嘅數據，日均成交量有
９﹒６巴仙來自花旗國，另外１１﹒３巴仙係來自歐洲，一旦部分資金流走對港交所傷害好大的
。
　　據路透引述歐洲私人銀行人士講，其實喺之前香江發生社會事件時有客戶已經準備好撤資
「Ｂ計劃」，但並沒有實行，認為事件過去就沒事了，不過最近有客戶開始考慮減少財富集中於
香江嘅風險。但係有學者就覺得事件唔會發展到咁悲觀，認為花旗國唔會走到取消承認香江「獨
立關稅區」地位呢步，指會影響到花旗國自己嘅企業，最多都係制裁官員。此外，４月罕有出現
由內地淨流出黃金１０﹒３噸至香江，為八年來首次錄得由內地淨流出，有分析指或係中央維穩
金融市場嘅操作。

＊港交所短期仍受壓＊

　　有分析指國安法對香江經濟嘅影響若從經濟學角度看或會經歷三個階段。第一階段主要嘅表
現係魚缸大跌，有資金流走，「孖屐」對於香江環境處於觀望狀態；第二階段則係消化及恢復，
主要表現係原本表現較差嘅經濟數據有好轉嘅跡象；而最後一個階段就資金或會再度回流，因為
經濟學中最主要嘅仍然係睇賺錢能力，如果佢發現依個地方係有賺錢潛力仍然係會投資的。
　　因此，阿臣就覺得係短期睇，事件對於港交所仍然會受壓，一來資金需要觀望局勢再作部署
，二來中概股回流都係為左吸納更多資金，若果香江投資氣氛較差，部分中概股或會延後上市或
再擇地方。不過，長線睇，中概股回流仍然係大勢所趨，畢竟九十年代嗰陣東瀛國同花旗國打貿
易戰都斷斷續續打咗成十幾年啦。再者，第二上市嘅公司有機會「染藍」，都會加大回流嘅吸引
力。從公仔圖睇，港交所現價仍與十天線（２６１﹒９８銀）差距較大，還是待今輪事件緩一緩
，待會調到２６０銀附近再作中長線部屬。
　　古臣持倉本周繼續按兵不動。
　　
　　表列截至５月２７日阿臣投資組合表現：
　
　　股份　　　　　　股數　　　　　平均買入價（元）　　　現價（元）　　　總值（元）
　－－－－－－－－－－－－－－－－－－－－－－－－－－－－－－－－－－－－－－－－
　　港股：　
　　ＳＰＤＲ金ＥＴＦ　　１０股　１０９７﹒００　　　１２４８﹒００　　　１２４８０
　　平安好醫生　　　　２００股　　　５２﹒９０　　　　１０１﹒３０　　　２０２６０
　　阿里巴巴　　　　　１００股　　１７６﹒００　　　　１９６﹒７０　　　１９６７０
　　微盟集團　　　　２０００股　　　　４﹒５５　　　　　　７﹒３５　　　１４７００
　　三一國際　　　　２０００股　　　　４﹒１１　　　　　　３﹒８７　　　　７７４０
　－－－－－－－－－－－－－－－－－－－－－－－－－－－－－－－－－－－－－－－－
　　股票市值　　　　：　　　７４８５０元
　　剩餘現金　　　　：　　１２７６２０元
　　組合淨值　　　　：　　２０２４７０元
　　組合本月收益表現：　　＋　０﹒６％（截至上月底止組合淨值：２０１２７０元）
　　組合累計收益表現：　　＋９２﹒８％（本金１０５０００元計）（２０１６年８月開倉）
　
　　＊數據截至今日上午１１：１５ａｍ