《魚缸博客》花旗國大玩無限ＱＥ、各國政府放水救市，通脹預期升溫，雖然油價因為俄國
同油組領袖沙特阿拉大打減價戰而壓到好低，不過油價對於供應鏈同整體物價嘅影響始終有一定
滯後，所以孖屐有唔少資金流入由被認為可以抗通脹嘅金市，金價前日已經破咗１６００美金，
認真犀利！
如果缸友對同金相關嘅投資產品有興趣，唔想經銀號買紙金，又覺得揸實金蝕手工費，可以
望下ＳＰＤＲ金ＥＴＦ（０２８４０），佢嘅走勢多數反映倫敦金銀市場協會（ＬＢＭＡ）金價
，因為資產淨值係參考ＬＢＭＡ每日下午黃金價格定值。而運作方式是持有金錠，不時以每手１
０萬股方式發行股份嚟換返黃金，亦會就贖回股份而分派黃金。隻ＥＴＦ提供嘅資料話，喺
２０１８同２０１９年，佢嘅表現同ＬＢＭＡ報嘅金價差距得０﹒５個百分點左右。不過缸友要
留意返，隻ＥＴＦ係唔會派息，即係如果要有錢落袋，淨係可以透過直接買賣佢嘅股份。
當然，孖屐仲有唔少金礦股值得留意，比較突出嘅有紫金（０２８９９）、招金
（０１８１８）同山東黃金（０１７８７），據紫金同招金嘅上年業績，佢哋嘅黃金業務銷售收
入分別佔營業收入近５８巴仙同逾８７巴仙。至於山東黃金睇中期業績，黃金係佔逾９９巴仙，
集團聽日（２７日）就出全年成績表，缸友不妨留意下。不過，上述三隻佬未必會跟金價跟得咁
貼，因為佢哋收益有一部分來自銷售其他礦物，例如銅、鋅同銀等，仲有管理層因素都要考慮埋
。況且依家講緊全球經濟走下波，供應同需求齊齊減少，呢啲礦物嘅需求真係唔敢諗。
總括而言，如果覺得金價嚟緊會大漲，可以考慮下入手ＳＰＤＲ金ＥＴＦ同山東黃金啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
