你……份人工夠使嗎？有唔少調查都話，「新鮮人」最想就係加入政府，不過唔係單單為咗「實踐抱負」，而係因為人工比起市價高出成截！Jenny都深知而家大學生畢業嘅起薪點同廿年前一樣，但係物價就一年貴過一年。相比之下，政府工的確係有「錢」途嘅荀工呀！咪話Jenny唔益大家，而家就有一份起薪3萬嘅政府工，仲講到明係請「年輕人」，雖然係非公務員合約，但都夠晒吸引啦！

與青年同行 月薪可達9萬5銀

　　呢份工就係改組咗嘅中央政策組做「政策及項目統籌主任」或「高級政策及項目統籌主任」喇！之前特首林鄭月娥喺《施政報告》嗰日已經係咁講話要「與青年同行」，所以呢兩份工會以非公務員嘅形式，請20至30個有志從事政策研究嘅年輕人加入，今日仲喺各大報章、政府網站刊登咗招聘廣告，但係就冇寫年齡限制。特首解釋話係因為廣告唔可以寫明年齡，不過就講到明係想搵「年輕人」嘅！至於點解分咗有「高級」同冇「高級」？林鄭話係希望兼顧一啲已經畢業咗一排、有工作經驗，但係又想加入嘅人士喎！不過呢個分別都幾大，因為「政策及項目統籌主任」月薪就係由3萬到4﹒8萬蚊；而「高級政策及項目統籌主任」月薪就係由6萬至9﹒5萬蚊，足足一個Double！

公共事務大包圍 機會嚟喇！飛雲！

　　呢份咁高人工嘅荀工，仲要講明係For年輕人，Jenny覺得今次真係「機會嚟喇！飛雲！」之不過主要係做啲咩、入職要求又係咩呢？根據廣告，改組之後嘅中策組會叫做「政策創新與統籌辦事處」，負責「政策研究和創新、提升公眾參與政策制訂，以及協助統籌由政府高層選定的跨局政策」。而「高級」嘅入職要求，除咗要有香港任何一間大學嘅一級或二級榮譽學士學位之外，仲需要有5年嘅相關政策研究、分析、公共事務等經驗；而冇「高級」就收順啲啦，兩年就得喇，不過一樣要有一級或二級榮譽學士學位嘅。

　　照咁計，如果一畢業就投身研究工作，或者留喺大學做研究生幾年，年紀應該都未過30大關，符合到「年輕人」呢三隻字吖！再加上Jenny見到「公共事務」呢個詞彙，其實都幾大包圍，話唔定Jenny都符合資格噃！

Mark實下月簡介會

　　相信有好多人都同Jenny一樣對呢份荀工好有興趣，嗱！Jenny喺呢到提埋大家，11月7號仲會喺政府總部會議廳有個招聘簡介會，有興趣嘅朋友記得喺11月3日之前經Email報名留位喇！到時小妹都會應該出現㗎！（先旨聲明我係去做嘢！我好愛我份工！我好愛我份工！我好愛我份工！）