民建聯（民記）搞嘅「年度漢字」評選今日終於有結果啦！呢個由民記親自搞嘅「公投」今年都有一萬七千人參加，而最高票當選今年嘅年度漢字就係個「貴」字，有成4246票㗎！

今年「年度漢字」由Horace揭曉，仲特登將甲骨文（左）同金文（中）嘅「貴」字都列埋出來。

何俊賢心水「新」字未中選

　　上個月Jenny就已經嚟過一次「年度漢字」記者發布會，率先睇吓今年民記搵咗邊10個字畀大家揀。Jenny同大家回顧一下先，今年嘅十大漢字有：「貴」、「樓」、「公」、「新」、「回」、「智」、「判」、「風」、「創」、「民」，Jenny仲記得當日嘅主持之一嘅「漁農界才子」、立法會議員何俊賢（Steven）嘅心水係個「新」字，貪佢點配詞都唔會有負面意思喎！可惜嘅係「新」字嘅得票只有1057票排尾三，睇嚟Steven拉票拉得未夠落力噃！

百物騰貴　人工唔夠花費　加得少就最閉翳

　　而今日個記者會就唔係Steven主持，而係搵咗佢同事張國鈞(Horace)幫手噃！Horace話，「貴」字之所當選，相信係市民都覺得近年百物騰貴，而家食個Lunch閒閒地都要5、60蚊，連碗牛雜米都要3、40蚊！但係人工又唔見追得上喎，所以個「貴」字真係影響到好多香港人。講起Lunch，Jenny諗返起上次葉劉食個56蚊豬扒飯都話係「價廉物美」，真係百物騰貴！如果人工都可以跟住上揚就Perfect池喇！

　　除咗個「貴」字，頭三甲仲有「樓」字同「民」字，Horace仲搞Gag話今次三甲好易記啫，咪就係「巿民覺得啲樓好貴」囉！OK，Horace， You Win！嗱！民記黨友好有愛心有笑出聲㗎！不過Jenny就唔識畀反應，彷彿見到頭上有幾隻「烏鴉」飛過咁囉……